Петропавлда IХ облыстық азаматтық форум өтті

МТРА жаңалықтары

1:13 14 Қараша 2020

«Азаматтық қоғам және мемлекет: “Біргеміз” серіктестігі мен дамудың 30 жылдығы». Петропавлда осындай атаумен / 9-ші облыстық азаматтық форум өтті. 2 жылда бір рет қанат жаятын жиын / биыл карантинге байланысты онлайн форматта ұйымдастырылды.

«Халық үніне құлақ асатын мемлекет» тұжырымдамасы. Бұл – Президент Қасым-Жомарт Тоқаевтың Жолдауындағы бағыттардың бірі. Құжатта билік бұқараға жақын және ашық болуы тиіс делінген. Ал екі жақты байланыстырушы алтын көпір болып үкіметтік емес ұйымдар саналады. Олар қарапайым халықтың әл-ауқатын жақсарту мақсатында етене еңбек етуде. Осы орайда мамандар жиында өлкедегі өзекті мәселелерді ортаға салды.

Жанат Мұхамеджанов – СҚО Азаматтық альянсы ассоциациясының төрағасы:

– Форум аясында 4 дискуссиялық алаң құрылды. Баяндамалар оқылды. Өңірімізде қордаланған мәселелер көтерілді. Яғни, жас отбасылар, әйел адамдардың құқықтары, сондай-ақ, пандемия кезінде қалыптасқан жағдай туралы айтылды. Тағы, ТҮКШ байланысты проблемалар көтерілді.

Ал Сергей Худяков форумда жергілікті өзін-өзі басқаруды дамыту жайлы сөз қозғады. Ол ауылдық округ әкімдерінің кандидатураларына қойылатын біліктілік талаптарын төмендетуді ұсынды.

Сергей Худяков – Жергілікті өзін-өзі басқаруды дамыту институтының директоры:

– Ауылдық округ әкімдеріне қойылатын талап, тіпті, Мәжіліс депутаттарына да қойылмайды. Осы орайда талап биіктігін төмендеткен жөн болар еді. Сондай-ақ, абаттандыру ережелерін бұзғаны үшін салынатын айыппұл мөлшерін де қысқарту керек сияқты. Өйткені, ауылда тұратын ағайынның қалтасына бұл айтарлықтай салмақ түсіреді.

Жиын барысында біраз мәселе ортаға шығарылды. Біраз ұсыныстар мен ой-пікірлер айтылды. Сондай-ақ, үкіметтік емес ұйымдардың алдағы уақытта атқарар жұмыстары айқындалды.

Жанат Мұхамеджанов – СҚО Азаматтық альянсы ассоциациясының төрағасы:

– Форумның соңында резолюция қабылданды. Үкіметтік емес ұйымдарды қалай дамыту туралы да айтылды. Бұл мәселелердің шешімі мен ұсыныстарын орталық және жергілікті атқарушы орындарға жолдайтын боламыз.

Жалпы, бүгінде өңірімізде 500-ге жуық үкіметтік емес ұйым тіркелген. Олардың 50-ден астамы ғана белсенді түрде жұмыс атқаруда. Оның басым бөлігі әлеуметтік мәселелерді шешуге септеседі. Айта кетейік, республикалық азаматтық форум қарашаның 23-і өтпек. Ауқымды іс-шара онлайн форматта ұйымдастырылады. Жиынға біздің өңірден де өкілдер қатысады.

Дана Сәлімқызы

Бұдан әрі оқыңыз

Петропавлда бос орындар жәрмеңкесі өтті
Шамадан тыс жүк артқан көлік иелеріне қатысты 17 хаттама толтырылған
Әскери-техникалық мектеп сарбаздары ант қабылдады
СҚО-дағы пошта бөлімдері толығымен автоматтандырылады
Халықаралық байқаудың жүлдегерлері марапатталды
БЖЗҚ-дан шекті соманы мыңнан аса солтүстікқазақстандық шешіп алды
Әйелдерге арналған “Ұмай” атты ипотекалық бағдарлама іске қосылды
Жыл басынан карантин талабы қанша мәрте бұзылды
СҚО тағы да «сары» аймақта
Ерлікке тағзым
СҚО-да балықтардың уылдырық шашу маусымы басталды
Жастар ардагерлердің өсиеттерін тыңдады