Солтүстікқазақстандық оқушылар екінші тоқсанда да қашықтықтан білім алуды жалғастырмақ. Облыстық ведомствоаралық комиссия мен бас санитарлық дәрігер осындай шешім қабылдады.
Яғни, оқыту процесі бірінші тоқсандағы тәртіп бойынша жүргізіледі. Ауылдардағы 360-қа тарта шағын жинақты мектеп штаттық режимде жұмыс істейді. Ал қалған білім ошақтарында 5-11 сынып оқушылары сабақтарын үйден оқуды жалғастыра бермек. Бастауыш сыныптар мен даярлық топтарында білім алатын 20 мыңға жуық бала кезекші сыныптарға баратын болады. Бүгінде олардың саны 1600-ден асады. Бұрынғыша бір сыныпта 15 баладан артық отырмауы тиіс, сабақтар екі кезеңмен жүргізіледі, ал мектеп әкімшіліктері барлық санитарлық талаптарды қатаң сақтауға міндетті. Ата-аналарға ғимарат ішіне кіруге рұқсат жоқ.
Валентина Черных, СҚО білім басқармасының бөлім басшысы:
– Оқыту процесінің форматы өңірдегі эпидемиологиялық жағдайға тікелей байланысты. Яғни, ахуал тұрақталса, өзгерістер енгізілуі мүмкін. Әзірге, ахуал тұрақсыз, сондықтан жауапты органдар осындай шешім қабылдап отыр.
Саят Ермек