Жыл басынан өңір полицейлері заңсыз айналымнан 390 келіден астам есірткі тәркіледі. Соңғы жағдай бірер күн бұрын тіркелді. Тәртіп сақшылары наша саудалап, бизнес жасамақ болған қала тұрғынын ұстады. Пысықай 3 қапқа толы марихуананы тасымалдау барысында құрықталып, қамауға алынды.
Toyota маркалы көлік жүргізушісін полицейлер Қизатов пен Хименко көшелерінің қиылысында тоқтатыпты. 44 жастағы азаматтың қасында 70-ші жылғы қала тұрғыны отырған. Темір тұлпардың жүк салғышынан тәртіп сақшылары скотчпен қапталған есірткіге толы 3 қап тапты. Анықталғандай, марихуана машинадағы жолаушыға тиесілі екен. Зиянды затты ол белгісіз біреуден алып, діттеген жерге дейін жеткізіп салу үшін жүргізушіні жалдаған.
Руслан Назаров – СҚО ПД бастығының орынбасары:
– Сот-химиялық сараптамасының нәтижесіне сәйкес, зиянды зат марихуана болып табылады. Салмағы – 60 келі. Полицейлермен құрықталған азамат құрылыс бригадасында жұмыс істейді. Қала тұрғыны осыған дейін де ұқсас қылмысы үшін құрықталған. Аталған іс ҚР ҚК 296-бабы, 4-бөлімі бойынша сотқа дейінгі бірыңғай тергеу реестріне енгізілді.
Күдікті уақытша ұстау изоляторына қамалып, қазір полицейлер оқиғаның анық-қанығын анықтап жатыр. Жыл басынан тәртіп сақшылары 390 келіден астам есірткіні заңсыз айналымнан тәркілеген. Оның 1690 граммы түрлі синтетикалық зиянды заттарға жатады. Қылмыстық жауапкершілікке 85 адам тартылды.
Эльмира Садвокасова