Спорт жаңалығымен бөлісейік! Қазақстанда шайбалы хоккейден ел чемпионаты басталды. Еске сала кетейік, карантинге байланысты біріншіліктің басталу уақыты бір айға кейінге шегерілген болатын. Дүйсенбі күні алғашқы 5 ойын ұйымдастырылды. Алайда, тартысқа толы матчтар жанкүйерлердің қатысуынсыз өтті.
Кеше жергілікті “Құлагер” командасы өз айдындарында “Ақтөбе” құрамасын қабылдады. Кездесуге қысқаша шолу жасайық. Есепті 12-ші минутта қарсыластар ашты. Көп ұзамай солтүстікқазақстандықтар таразы басын теңестірді. Шайба авторы – шабуылшы Максим Первухин. Айдын иелерінің қуанышы көпке созылмады. Екінші кезеңде батыстықтар тағы алға шықты. Дегенмен, соңғы периодта таблодағы сандар теңесті. Жерлесіміз Евгений Попитич көзге түсіп, есепті 2 де 2 қылды. Сөйтіп, қос тарап овертаймда күш сынасты. Жеңімпаз бұл сында да анықталған жоқ. Ал ақтық буллиттер сериясында “Құлагер” / “Ақтөбеден” 2 де 3 есебімен ұтылып қалды. Қос команда арасындағы келесі ойын сейсенбі күні сағат 17:00-де басталады.
Бисенова Жанна