Петропавлда 200 орындық инфекциялық аурухананың құрылысы жүріп жатыр. Істі елордалық компания атқаруда. Мамандар нысанды қыркүйектің соңында тапсырамыз дейді. Бұған дейін мұндай тез тұрғызылатын инфекциялық аурухананы құрылысшылар тек Нұр-Сұлтан, Алматы мен Шымкентте ғана салған екен.
Бұл орында алдағы уақытта инфекциялық аурухана болады. Шаруа тамыз айының басында басталып кеткен. Құрылыстық аумағы 8 мың шаршы метрден асады. Мердігер компания өкілі Олжас Қуатовтың айтуынша мұндай тез тұрғызылатын инфекциялық аурухананы олар еліміздің 3 қаласында салыпты.
Олжас Қуатов – «KAZPACO» ЖШС диспетчері, Нұр-Сұлтан қаласы:
– Инфекциялық аурухана тұрғызуда біраз тәжірибеміз бар. Бұған дейін Нұр-Сұлтан, Алматы, Шымкент қалаларында салған едік. 4-шісін Петропавлда тұрғызып жатырмыз. Қазіргі күні нысанда 200 адам еңбектенуде. Олардың тең жартысынан астамы – жергілікті азаматтар.
Ғимараттың қаңқасы тез көтеріледі екен. Ол үшін құрылысшылар бетоннан құйылған дайын модульді блоктарды қолданамыз дейді. Жұмысшы саны да өседі. Алдағы уақытта мұнда 500 адам еңбектенетін болады.
Арман Ғизатов – «KAZPACO» ЖШС геодезисі, Нұр-Сұлтан қаласы:
– Бетон құйылып болған соң сырты қапталып, фасадпен жабылады. А, Б, С блоктарының бәрін солай жасап шығамыз.
Аурухана 2 айда дайын болады. Тамызда басталған шаруа қыркүйектің соңында тапсырылады. Мамандар құрылыс біткен соң нысанның сыртын да абаттандыруды көздеп отырмыз дейді.
Бердимурат Баймухан