Елімізде тәжді вирусты ауыздықтауға қыруар қаржы бөлініп жатыр. Қомақты ақшаның бір бөлігі Әлеуметтік медициналық сақтандыру қорына тиесілі. Мысалы, біздің өңірге қордан 1.5 млрд теңгеге жуық қаражат бөлініпті.
Лариса Гордеева – “Әлеуметтік медициналық сақтандыру қоры” КЕ АҚ СҚОФ директоры:
– Халыққа көмек көрсету үшін 23 медициналық мекемемен 339 млн теңгеге шарт жасалды. Қауіпті аймақтарда жұмыс істеп жатқан медициналық қызметкерлерге үстемеақы төлеуге 983 млн теңге бөлінді. Және ПТР-диагностикаға 173 млн теңге қарастырылды.
Бұдан бөлек, Медициналық сақтандыру қоры дәрі-дәрмек үшін де ақша бөледі. Төлем 100% жасалған. “СК-Фармация” серіктестігімен келісімшарт жасалыпты.
Лариса Гордеева – “Әлеуметтік медициналық сақтандыру қоры” КЕ АҚ СҚОФ директоры:
– Халықты дәрілермен қамтамасыз ету. Бұл – негізгі міндеттердің бірі. Сондықтан түрлі шаралар қабылданып жатыр. Бұған дейін Денсаулық сақтау министрі Алексей Цой негізгі тізімге 5 фармпрепаратты қосу мәселесін көтерді. Егер де дәрілер қабылданса, олар дәрігерлердің тағайындауы бойынша халыққа қол жетімді болмақ.
Сөз соңында айта кетейік, Әлеуметтік медициналық сақтандыру қоры коронавирус инфекциясымен ауырған жандардың ем-домын өтейді.
Мысалы, індеттің жеңіл түріне шалдықан бір науқасқа – 292 600, орташа түріне – 446 100, ал ауыр түріне шалдықан жанның еміне 1,5 млн теңге қарастырылған.
Ешкенова Дана