Көрсетілетін мемлекеттік қызметтердің сапасын арттыру, қағазбастылықтан арылу. Бүгінде атқарушы билік органдары осындай форматқа ауысып жатыр.
Қазір облыстық Табиғи ресурстар және табиғатты пайдалануды реттеу басқармасы мемлекеттік қызметтің 4 түрін көрсетеді. Оның 3-еуі цифрлы негізде жүргізіледі. Олар – экологиялық сараптама қорытындысын бекіту, қоршаған ортаға эмиссиялар үшiн және жануарлар дүниесін пайдалануға рұқсат беру. Аталған құжаттарды тұрғындар үйден шықпай-ақ egov.kz порталы арқылы ала алады. Ал ағаш кесу және орман билеттерін алу үшін қағаз толтыру керек. Жалпы, былтыр Табиғи ресурстар және табиғатты пайдалануды реттеу басқармасы 4 мыңнан астам қызмет көрсетіпті. Бұл жайлы өңірлік коммуникациялар қызметінің баспасөз алаңында ведомство басшысы Бейбіт Исманов мәлім етті.
Бейбіт Исманов – СҚО табиғи ресурстар және табиғатты пайдалануды реттеу басқармасының басшысы:
– 2020 жылдың 1 тоқсанында басқарма 935 қызмет көрсетті. Оның 381-і – қағаз жүзінде, ал 554-і электронды форматта жүргізілді. Қаңтар-наурыз айлары аралығында тұрғындар тарапынан мемлекеттік қызмет көрсету мәселелері бойынша шағымдар түскен жоқ. Барлық іс уақытында тындырылды.
Дана Ешкенова