Сәуір айының соңында парамен ұсталған шалақындық полицейге қатысты үкім шықты.
Аудандық полиция бөлімі бастығының бірінші орынбасары карантин кезінде жеке көлігімен кедергісіз қатынау үшін тұрғыннан 1 млн 300 мың теңге көлемінде ауызбастырық алмақ болған еді. Дегенмен, қитұрқы әрекеті іске аспай, жемқор дер кезінде құрықталды. Кінәсі сотта дәлелденіп, 3 жарым жылға темір торға тоғытылды. Алдағы уақытта мұндай парақорлық фактілерінің алдын алу үшін жемқорлыққа қарсы ведомство бірқатар іс-шараларды жүргізуді жоспарлап отыр.
Ернар Баянғазин – ҚР Сыбайлас жемқорлыққа қарсы іс-қимыл агенттігі СҚО бойынша департаментінің басшысы:
-Мұндай заңбұзушылықтардың орын алуына себеп болатын факторлардың көзін жою керек. Қатардағы тұрғындардың сыбайлас жемқорлыққа қарсы заңнамаға қатысты сауаттылығын арттыруды қолға алмақпыз. Сондай-ақ, полиция департаментінің жеке құрамымен парақорлықтың салдары турасында сабақтарды жиірек жүргізетін боламыз.
Эльмира Садвокасова