Балаларды қорғау күнінде Латфулиндер отбасы да назардан тыс қалған жоқ. Мемлекеттік қызмет істері агенттігінің жергілікті өкілдері мерекеге орай құттықтау шарасын ұйымдастырды.
Вадим және Оксана Латфулиндер 10 бала тәрбиелеп отыр. 7 ұл және 3 қызы бар.
Үлкені – тұрмыста, ал кішісі алдағы оқу жылында мектеп табалдырығын аттамақ. Бүгін көпбалалы отбасыны мамандар мерекемен арнайы құттықтай келген.
Азық-түлік, түрлі тәттілер мен ойыншықтар. Сыйлық алған балалардың қуанышында шек жоқ.
Вадим Латфулин:
– Мереке күні келіп, балаларымызды қуантып жатқандарыңыз ерекше сезім сыйлайды, жүрекке жылу береді. Ниеттеріңізге мың алғыс. Сіздер сияқты ізгі жандар көп болсын.
Ұл-қыздар кішкентай болса да әке-шешесіне қолғанат екен. Қыздар үнемі анасына үй шаруасына жәрдемдессе, ұлдар жағы әкесімен бірге сырттағы шаруаларды реттейді.
Давид Латфулин:
– Біздің қояндарымыз бар. Оларға інім екеуіміз шөп жұлып береміз. Әкемізге машина жөндеуге көмектесеміз. Үлкен аға-әпкелерім маған үнемі сабақ істеу барысында қолдау көрсетеді.
Мемлекеттік қызмет істері агенттігінің жергілікті департаментінің қызметкерлері көпбалалы отбасыларға сыйлық жасауды дәстүрге айналдырған. Сондай-ақ, көмекке мұқтаж жандарға жәрдемдеседі.
Қайрат Садықов – ҚР Мемлекеттік қызмет істері агенттігі СҚО бойынша департаментінің баспасөз хатшысы:
– Жуырда 3 жасар екі көзі жоқ балаға көмек көрсеттік. Содан кейін осы Жұмысшы кентінде өрттің салдарынан баспанасыз қалған отбасыға көмек жасадық.
Мамандар негізі бір жылдың ішінде көпбалалы 15-тен астам отбасыға көмек көрсетеді екен.
Актолкын Солтанханкызы