Елімізде төтенше жағдай режимі аяқталып, карантин жеңілдетілуде. Осыған байланысты ертең қаладағы мектепке дейінгі білім беру ұйымдары қызметтерін қайта бастайды.
Қаламыздағы «Нұрсәт» балабақшасының ішінде қауырт жұмыс. Мұнда 150 ұл-қызды қайта қарсы алуға дайындық жүріп жатыр. Істі тәрбиеші, тазалаушылар мен аспаздар атқаруда. Оларға жүктелген міндеттердің бірі – зарарсыздандыруға ерекше көңіл бөлу.
Зәукен Галимова – «Нұрсәт» балабақшасының меңгерушісі:
– Балабақша ертеңнен бастап ұл-қыздарды қайта қабылдайды. Оған дайынбыз. Санитарлық талаптардың бәрін орындадық. Білім беру ұйымы барлық залалсыздандыру құралдарымен қамтылған. Қабылдау бөлмелеріне санитайзерлер қойылған. Бізде барлығы 14 топ бар. Оның 4-еуі – қазақ тілінде, ал қалғандары орыс тілінде оқытылады.
Бүгінде қалада 57 мектепке дейінгі білім беру ошағы бар. Мамырдың 13-інен, яғни ертеңнен бастап олардың барлығы өз жұмысын қайта бастайды. Бірақ, балаларын балабақшаға апаруға, әзірге, жұмыс істейтін ата-аналар ғана рұқсат етілген.
Сайран Испандьярова – қалалық білім беру бөлімінің сектор меңгерушісі:
– Ертеңнен бастап балабақшаларда кезекші топтар жұмыс істейді. Топтарға балақайлар жас ерекшеліктері бойынша іріктеледі. Әрқайсысында 15 адамнан ғана болуы тиіс. Бұл еліміздің бас санитарлық дәрігерінің қаулысында көрсетілген. Ал мамырдың 18-і күні ата-аналардың барлығы ұл-қыздарын балабақшаға әкеле алады.
Осы орайда ата-аналар бірқатар ережені ескергендері жөн. Олар балаларын балабақшаға әкелмес бұрын ұл-қыздарының денсаулығы жайлы анықтама ұсынулары тиіс.
Сайран Испандьярова – қалалық білім беру бөлімінің сектор меңгерушісі:
– Төтенше жағдай тоқтағанымен, карантин шаралары сақталғаны жөн. Біз ата-аналарды мына ережені білуге шақырамыз: кішкентайларды балабақшаға жасы 65-тен асқан, ауру адамдармен қарым-қатынаста болған және аяғы ауыр жандармен жіберуге болмайды. Сондай-ақ, ата-аналар учаскелік балалар дәрігерінен эпидаумақтың тазалығы жайлы анықтама алуы қажет.
Барлық балабақшада санитарлық талаптар қатаң сақталады дейді мамандар. Бөлмелер жуылып, әр сағат сайын желдетіліп, кварцталып отырады.
Бердимурат Баймухан