Құқық қорғаушылар төтенше жағдай кезінде қоғамдық тәртіп пен тиісті талаптардың сақталуын қатаң бақылауда. Егер қандай да бір заң бұзушылық анықталса, тұлға әкімшілік жауапкершілікке тартылады. Бүгінге дейін өңірде мұндай 40-тан аса факті тіркелген. Жауапты іске жергілікті 400-ден аса маман тартылыпты.
Көшеде адам да, көлік те аз. Бұл – Петропавлдың қазіргі кейпі. Тұрғындар енгізілген шектеу шараларына түсіністікпен қарайды. Азаматтар үйден тек қажет болған жағдайда ғана шығады. Бұл – күшейтілген режимде жұмыс істеп жатқан полицейлердің пікірі.
Айдын АҚМАҒАМБЕТОВ – Петропавл қалалық ПБ ЖПҚ бөлімі бастығының орынбасары:
– Кешкі және түнгі уақытта жаяу жүргіншілер мен көлік тізгінін ұстаған жандар бей-берекет жүрмеулері тиіс. Сондай-ақ, кәмелетке толмаған ұл-қыздар әр уақытта да заңды өкілдерімен жүрулері қажет. Тәртіпті бұзғандар әкімшілік жауапкершілікке тартылады.
Сонымен қатар, көпшілік орындарда 3 адамнан артық жиналмауы және жерлестеріміз белгілі бір арақашықты сақтаулары керек. Мұны полицейлер өңір тұрғындарына ескертіп жүр.
Полицейлер қаладағы сауда орталықтарын да бақылауға алған. Қазір азық-түлік дүкендері мен супермаркет иелері нысандарға маска таққан тұрғындарды ғана кіргізуі қажет. Және ғимараттың ішін 2 сағат сайын зарарсыздандырып, кіреберіске антисептик орнатуға міндетті. Бұл ережені бұзғандар жазаланады. Жалпы, бүгінге дейін облысымызда 41 адам әкімшілік жауапкершілікке тартылған екен.
Бердимурат Баймухан