Петропавлда салынып жатқан жаңа қазақ театры тамыз айында ашылмақ

Құрылыс, Мәдениет

22:02 10 Наурыз 2020

Облыс орталығында салынып жатқан жаңа қазақ театры халық игілігіне тамыз айында тапсырылуы тиіс. Ашылуы  Абайдың 175 жылдығымен тұспа-тұс келетін мәдениет ошағының құрылысына  ел қазынасынан 3 млрд теңге қаржы бөлінген екен. Нысан 4 қабаттан тұрмақ, көрерменге арналған 500 орын болатын көрінеді. Жобамен бүге-шүгесіне дейін таныспасақ та құрылыстың қарқынын біліп қайттық.

2 жыл бұрын мына жерде ескі жер үйлер тұрған. Олар сүріліп, орнына зәулім мәдениет ошағы салынып жатыр. 2018-дің соңында басталған құрылыс жұмыстары былтыр аяқталуы тиіс болатын. Бірақ, шаруа барысы біраз кешеуілдеген соң нысанды тапсыру мерзімі биылға шегерілді. Ендігі меже – қазіргі қарқыннан таймау.

Қарқын қызу дейді мердігер. Нысанды салып жатқан – елордалық компания.

Еслям Нұрғалиев – СҚО құрылыс, сәулет және қала құрылысы басқармасының бөлім басшысы:

– Әзірге, сыртқы жұмыстар жүріп жатыр. Құрылыс материалдары жеткілікті. Елордалық мамандармен бірге Петропавл ауыр машина жасау зауытының жұмысшылары да еңбектенуде. Барлығы – 70 адам. Аталған зауытта металл құрылымдары жасалады. Кейін ол осы жерде монтаждалады.

Жаңа қазақ театрын салуға ел қазынасынан 3 млрд теңгеден астам ақша бөлінген екен. Қаражаттың үштен бірі игеріліп, жоспарланған істің 30 пайызы орындалыпты.
Ішкі әрлеу жұмыстарына кезек сәуірде келетін көрінеді. Осы кезде Нұр-Сұлтаннан тағы мамандар тартылмақ.

Еслям Нұрғалиев – СҚО құрылыс, сәулет және қала құрылысы басқармасының бөлім басшысы:

– Әдетте, ішкі әрлеу жұмыстары біраз уақытты алады. Сол себепті, жұмысшылардың санын арттырмақшымыз. Құрылысшылар қазіргі қарқыннан таймаса нысан кесте бойынша тапсырылады.

4 қабат, 500 орын. Көптен бері армандаған жаңа қазақ театры есігін тамызда айқара ашпақ. Мәдениет ошағының халық игілігіне берілуі Ұлы Абайдың 175 жылдығымен тұспа-тұс келіп отыр. Мерейлі датаға байланысты жергілікті актерлер қауымы жаңа қазақ театрындағы алғашы маусымды Абай туралы спектакльмен бастаймыз деп қамданып жатыр.

Дана  Ешкенова

 

 

Бұдан әрі оқыңыз

Бескөлде күзде 5 қабатты үй қолданысқа тапсырылады
Жергілікті өнер иелері онлайн концерт өткізбекші
“Небесный тихоход” қойылымының тұсаукесері өтті
“Алтын Орда: ғасырлар үндесуі” көрмесі қанат жайды
Эстрадалық және джаз музыкасы оркестріне – 20 жыл
Наурыздың 27-сі – Халықаралық театр күні