Дауылды ескертуді елемегеннің салдары. ТЖД қызметкерлерінің сөзінше осы демалыс күндері өңірде боран, әсіресе, Айыртау, Ғ.Мүсірепов, Тимирязев және Шал ақын аударында аса қатты болған көрінеді. Мамандар 3 күнде қар құрсауында қалып қойған 150-ге жуық адамды құтқарған.
Бұл – Сергеевка қаласы. Ақтүтек бораннан жол көрінбейді. Темір тұлпардың жүргізушісі үйдің арасы осындай болса, трассадағы жағдай қандай екен деп үрейленіп отыр.
Ал көкшетаулық балықшылар ауа райының қыңыр мінезінен сескенбепті. 112-ден келген үздіксіз хабарламаларға да мән бермеген көрінеді. Ескертулерді елемеген жандардың көлігі Тайынша ауданындағы Теңдік ауылының маңында аударылып қалған. Абырой болғанда жолаушылардың барлығы дін аман.
Рамиль Камалов – СҚО ТЖД бастығы:
– Қаңтардың 23-і мен 26-сы аралығында облыс аумағында қар құрсауынан 25 көлік шығарылып, 149 адам құтқарылды. Оның 11-і -бала. Тағы 3 жүк көлігі мен 1 автобус шығарылды. Жалпы, құтқару шараларына 120-дан астам маман мен 60-қа жуық техника жұмылдырылды.
Синоптиктердің сөзіне сенсек, бүгіннен бастап облыс аумағында ақтүтек боран бәсеңдиді. Есесіне ауа температурасы төмендейді. Сынап бағанасы -20 градустың төңірегінде болады.
Актолкын Солтанханкызы