Ұлттың тірегі де, алтын арқауы да – қазақтың әжелері

Қоғам

21:36 1 Қараша 2019

Ұлттың тірегі де, алтын арқауы да – қазақтың әжелері. Осындай атаумен облыс орталығында әжелерді ұлықтау кеші өтті. Алқалы жиынға 40-қа жуық ақ жаулықты ана қатысты. Олар жиналғандарға ұлттық тәрбие мен отбасы құндылықтары жайлы кеңес берді.

Ел болам десең бесігіңді түзе. Бүгінгі шараның мақсаты – асыл әжелердің ұлағатты сөздерін жастарға насихаттап, бойларына ұлттық тәрбиені сіңіру.

Күлімкөз Смаилова – облыстық ҚХА жанындағы Аналар кеңесінің төрайымы:

– Біз бүгін қазақ әжелерін ұлықтау үшін мереке өткізіп жатырмыз. Мұнда ақ жаулықты әжелеріміз өз ақыл-кеңестерін айтады.

Халқымыздың баланы тәрбиелеуінде – бойларына асыл қасиет жинап, қазақи болмыстан айырылмаған әжелеріміздің алар орны ерекше. Тарих пен салт-дәстүр дәріптелген жиында сөз алған әжелер ұлттық тәрбиенің артықшылығына тоқталып, жиналған көпшілікке тағылымды насихат айтты.
Сапура қажы Тәшенова 7 бала тәрбиелеп өсірген. Ұлын ұяға, қызын қияға қондырған кейуана бірнеше рет Меккеге барған. Ол өзінің өмірден көргенін, білген-түйгенін жастарға айтып, ақыл-кеңесімен бөлісті.

Сапура қажы Тәшенова – облыстық “Қызылжар” орталық мешіті жанындағы әжелер мектебінің мүшесі:

– Жастарымыз ақылды болу керек. Ер азаматтарымыз намысты болып, елімізді қорғай алулары керек. Қыздарды үлкен болса әпкем деп, кіші болса қарындасым деп сыйлай білулері тиіс.

Әженің ақылы мен тәрбиесін алған ұл-қыздар иманды, арлы, өнегелі болып өседі. Ақ жаулықты аналардың ғибратты әңгімесін тыңдауға қаладағы барлық қазақ мектептерінің қыздары жиылған. Қазыналы қарияларымыздың айтқан ақыл-кеңесімен сусындап отырған бұрымдылардың қатарында Ақлима Есенова да бар.

Ақлима Есенова – “әл-Фараби” мектеп-лицейінің оқушысы:

– Әжелер бізге көп ақыл-кеңес берді. Адал, еліміздің патриоты болу керек екенімізді айтты.

Жиын барысында әжелерге сыйлықтар таратылып, ән мен биден шашу шашылды.

Бердимурат Баймухан

 

Бұдан әрі оқыңыз

Үлгілі отбасы
Жазасын өтеушілер туғандарымен видеобайланысқа шығуда
Қаланы көркейту жұмыстары
Балабақшалар келушілерді қайта қабылдайды
Жыл басынан өлкеге 156 отбасы қоныс аударған
Бәйтерек ауылының тұрғыны соңғы қоңырау салтанатын үйінде ұйымдастырған
Мамырдың 23-і қайырымдылық сенбілігі өтеді
Вера Яворская: баланы тарихқа баулып өсіру керек
ХҚКО-да қызметтердің 660-қа жуығы онлайн режимде көрсетіледі
Петропавл әуежайының жұмысы қайта жанданды
Бүгін – қасиетті Қадір түні
ҰОС-ның ардагері 100 жасқа толды