Мағжан Жұмабаев ауданында жанармай құйылған екі бірдей көлік жанып кетті. Кеше Қарақоға ауылы маңындағы «Жигалова Карагугинское» шаруа қожалының аумағындағы жанармай базасында өрт шыққан.
Бұл туралы хабар өрт сөндірушілерге сағат 2-ден 51 минут кеткенде түскен. Тілсіз жауды ауыздықтауға 26 маман мен 7 техника жұмылдырылыпты. От шаруашылықтың жанармай базасында КАМАЗ автоцистернасынан дизель отынын ағызу кезінде шыққан. Қатты жел өртті өршітіп, қасында тұрған ГАЗ-53 көлігін де шарпиды. Салдарынан екі машина да жанып кеткен. Мамандар қызыл жалынмен шамамен 2,5 сағаттай алысып, сағат 5-тен 39 минут кеткенде ауыздықтайды. Абырой болғанда, зардап шеккендер жоқ. Әзірше, өрттің шығу себебі мен материалдық шығын мөлшері белгісіз.
Ешкенова Дана