Спортсүйер қауымға сүйінші жаңалық! Жергілікті боксшы Евгений Павлов Бангкок қаласында өткен халықаралық “Thailand Open 2019” турнирінде үздіктер қатарынан көрінді.
Ересектер арасында ел намысын қорғаған былғары қолғап шебері 5 бірдей кездесу өткізді. Алдымен ол Тайланд, Малайзия, Боствана мен Моңғолия елдерінің өкілдерін тізе бүктірді. Ал, финалда 2016-шы жылғы олимпиада ойындарының жүлдегері қытайлық споршымен күш сынасты. Тартысты кездесуде Женя қарсыласына есе жіберіп, күміс алқаны місе тұтты. Жалпы, дүбірлі додада 37 мемлекеттің боксшылары бақ таластырды. Жарыста Қазақстан ұлттық құрамасының 8 мүшесі өнер көрсетіпті. Олардың тек екеуі ғана үздік үштікке ілініп, медаль еншіледі.