Өңірде заңсыз аң аулау фактілері азаяр емес. Соңғы оқиға Жамбыл ауданының Благовещенка ауылының маңында орын алған. Қазір осы елді-мекеннің тұрғындары 4 сібір елігін рұқсатсыз атты деп айыпталуда. Жалпы, жыл басынан облыс бойынша осындай 632 браконьерлік фактісі тіркелген.
Мына суреттерде 6 маралдың өлі денелерін көруге болады. Оларды оқиға орын алған қазанның 19-ында тәртіп сақшылары түсіріп алған. Заңбұзушылар көп ұзамай анықталды. Олар – Петропавл қаласының 3 тұрғыны болып шықты. Сезіктілердің марал атуға рұқсат беретін құжаттары болмаған. Осылайша, олар мемлекетке 4 млн. теңгенің шығынын келтірді. Енді күдіктілер ҚР Қылмыстық Кодексінің 337 бабының 4-ші бөлімі бойынша жауапкершілікке тартылып, 5 мың АЕК көлемінде айыппұл төлейтін болады. Көп ұзамай дәл осындай жағдай Жамбыл ауданының Благовещенка ауылының жанында қайталанды.
Сергей Липко – СҚО ІІД жергілікті полиция қызметі табиғатты қорғау полициясы бөлімінің бастығы:
– Қазанның 26-сы күні Благовещенка ауылының маңынан 4 сібір елігінің бастары мен терісі табылды. Тексеріс нәтижесінде бұл оқиғаға сол елді-мекеннің 2 тұрғынының қатысы бар екені анықталды. Олардың аңшылық құжаттары болмаған. ҚР Қылмыстық Кодексі бойынша браконьерлер 2 мың айлық есептік көрсеткіш көлемінде айыппұл төлейді немесе 2 жылға бас бостандығынан айырылады.
Жалпы, жыл басынан облыс бойынша 632 құқықбұзшылық орын алса, соның 76-на байланысты қылмыстық іс қозғалған. Ал, 556 азамат әкімшілік жауапкершілікке тартылды. Айта кеткен жөн, қарашаның 1-нен өңірде қысқы аңшылық маусымы басталады. Осыған орай желтоқсанның 31-не дейін қарсақ, түлкі сияқты жыртқыш аңдарлы және қоян аулауға, ал, ақпанның 15-не дейін құс атуға рұқсат етіледі.
Молдир Шаяхмет