Облыстық «Қызылжар» орталық мешітінде «Мектепке жол» қайырымдылық акциясы ұйымдастырылды. Игі іс-шара барысында 50 балаға оқушы сөмкесі мен мектепке қажетті құрал-жабдықтар тарту етілді.
Әйгерім Рамазанованың бес баласы бар. Екеуін – колледжге, ал үшеуін мектепке дайындап жатқан ата-ана үшін бүгінгі игі іс үлкен көмек екенін айтады.
Әйгерім Рамазанова – ата-ана:
– Дін өкілдеріне ризашылығымды білдіремін. Бұл – біз үшін үлкен көмек. Үш балам да мәз болып қалды.
Әйгерім Рамазанованың кенжесі – Данияр биыл 4-ші сыныпқа барады. 9 жастағы жеткіншек жазғы демалысын жақсы өткізіп, мектептегі достарын сағынған екен.
Бүгін 50 балаға сөмкелер сыйға тартылды. Оның ішінде мектепке қажетті құрал-жабдықтардың барлығы бар.
Данияр Имамбетов:
– Мен жаңа оқу жылында сабағымды жақыс оқуға уәде беремін. Бүгінгі сыйлықтар қатты ұнады.
Облыстық «Қызылжар» орталық мешітінің бас имамы Кенжетай қажы Дүйсенбай балаларға жаңа оқу жылында сәттілік тілеп, білім алу – мұсылман міндеттерінің бірі екенін айтты. Осы орайда мешіт тарапынан ұйымдастырылып жатқан мұндай игі істердің алдағы уақытта жалғасын табатындығын жеткізді.
Кенжетай қажы Дүйсенбай – Облыстық «Қызылжар» орталық мешітінің бас имамы:
– Аталмыш акцияның мақсаты – балалардың 1-қыркүйек күні мектепке қажетті жаңа құрал-жабдықтарды алып баруына аз да болса көмек көрсету. Бастысы – балаларға мейірім мен қуаныш сыйлау.
Айта кеткен жөн, осындай игі іс “Қызылжар” орталық мешітінде 5 жыл қатарынан ұйымдастырылып келеді.
Дана Ешкенова