Сахна шымылдығын ең жас әншілерден құралған түмендік “Мерей” қазақ әндерінің ансамблі ашты. Олар көңілді шығармалары және билерімен көрермендерді бірден баурап алды. Азиза Ауғанова осы “Мерей” ансамблінде 3-жылдай ән шырқап жүр. Бүгінгі фестивальге нәзікжанды “әкеге арнау” туындысын әзірлеген.
Азиза Ауғанова – байқауға қатысушы, “Мерей” ансамблі, Түмен қаласы:
– Атамның дүниеден өткеніне жақында бір жыл болады. “Әкеге арнау” әні атама арналады. Атам мені кішкентайымнан өсіріп, аялаған және ол менің алғашқы ұстазым. Петропавл қаласына мен осымен 5-ші рет келіп тұрмын. Ал, фестивальге 3-ші жыл қатарынан қатысып келемін.
Ал, омбылық “Наследие” вокалды триосы сахнада орыс, украин және казак халық әндерін құйқылжыта орындады. Бүгінгі шарада жерлестеріміз трионың орындауындағы украин халқының “Це моя земля” и “Сила птаха” туындыларын ұйып тыңдап, әртістердің өнеріне тамсанды. Фестиваль жарыс сипатында өтті. Шығармашылық бағдарламада әр ұжым танымал халық әндерін орындады.
Айым Мұқышева – “Қоғамдық келісім” КММ жетекші эксперті:
– Міне, 3-ші жыл қатарынан біз Қазақстан мен Ресей арасындағы қарым-қатынасты паш ететін “Песня без границ” фестивалін өткізіп келеміз. Аталмыш іс-шара арқылы ұлттар арасындағы бірлік пен келісімді нығайтпақшымыз.
Іс-шара соңында барлық қатысушыларға алғыс хаттар мен естелік сыйлықтар табысталды.
Альмира Жетпісбай