Шампан, сыра, арақ. Барлығы – 52 мың шөлмек. Олардың басым бөлігі Қазақстан мен Ресей шекарасынан заңсыз өткізбекші болғандардан, ал кейбірі, тіпті, дүкен сөрелерінен сот шешімі бойынша тәркіленіп алыныпты.
Мына жерде акциздік маркасы жоқ темекілердің 3 мың 300 қорабы жеткізілген. Оның барлығы бүгін отқа тасталды.
Аман Төрегелдин – СҚО мемлекеттік мүлік және жекешелендіру департаментінің басшысы:
– Өткен жылдары осындай жұмыстарға 300 мың теңге қаражат кететін.
Тәркіленіп алынған алкогольдік өнімдер бұрынғыдай техникамен жаншылмайды. Ішіндегісі кәріздік коллекторға құйылып, шынысын “Вторсырье” серіктестігі қайта өңдеуге жөнелтеді.
Қайыржан Айсин – “Вторсырье” ЖШС директоры:
– Бүгінгі бөтелкелерді қайта өңдеуге Алматы қаласына жібереміз. Шынылар балқытылып, қайтадан жаңа құтылар жасап шығарылады.
Осымен Петропавлда жыл басынан бері контрафактілік өнімдерді жою жұмыстары екінші рет жүргізіліп отыр.
Дана Ешкенова