Бұл QR код болып табылады. Мәселен, осы суретті смартфоныңызбен сканерлеу арқылы кез келген жәдігердің тарихымен танысып, мол мағлұматпен қаныға аласыз. Қазіргі таңда “Абылай хан резиденциясы” мұражай-кешенінде жаңашылдықты енгізу жұмыстары қарқынды түрде жүргізілуде. Жыл басынан мұндағы 11 жәдігерге QR код қойылған.
Гүлнәр Жұмабекова – “Абылай хан резиденциясы” мұражай кешенінің экспозиция және көрме ұйымдастырушы маманы:
– Екеуі алаңда біздің, біреуі ескерткішке, екіншісі ғимараттар сыртында тұр. Ал, енді 9-ы музей ішіндегі 4 залда орналастырылған. Біздің кодтарымыздың ішінде қазақ және орыс тілінде мағлұматтар бар. Алдағы уақытта біз енді ағылшын тілінде де ақпараттарды ұсынбақ ойымыз бар.
Бүгіндері мұражай-кешенінің қорында 600-ге жуық жәдігер бар.
Сондай-ақ, QR код жүйесі облыс орталығындағы 25 тарихи-мәдени ескерткіш пен нысанға орнатылған. Дегенмен, мамыр айының соңына дейін оның саны 32-ге дейін жетпек.
Жанат Баймүсенов – СҚО мәдениет, мұрағат және құжаттамалар басқармасының бас маманы:
– “Рухани Жаңғыру” бағдарламасы аясында “Заман таспасы” жобасы іске асуда. Оның аясында шаһарымызда туристік бағыттар құрылды. Маршруттар негізінен тарихи-мәдени нысандарды қамтиды. Алдағы уақытта теріскейдегі 200-ден астам ескерткішті QR код жүйесімен қамту жоспарланған.
Айта кетсек, мұндай бастама біздің өңірімізден басқа Павлодар және Ақмола облыстарында да қолға алынған.
Тоғжан Ақмағамбетова