Суырып салма сөз шеберлерінің додасында жергілікті Шыңғысхан Ғабдуллин ерекше көзге түскен. Тапқыр ойларымен танылған ұлға бағалы сыйлық тарту етіліпті. Ал, Диас Аяған 1-ші орын иеленді. 9-шы сыныпта оқитын жерлесіміз ақмолалық 2 қарсыласын шаң қаптырған. Ақтық сында талай республикалық жарыстарда бақ сынаған тәжірбиелі Саягүл есімді бойжеткенді сан соқтырыпты.
Диас Аяған – Әбу Досмұхамбетов атындағы облыстық дарынды балаларға мамандандырылған гимназия-интернатының оқушысы:
– Саягүл менің құрдасым. Жақсы қызбен-жігіт айтасын жасадық. Өнеріміз көрерменге ұнады.
Қос өрен де облыстық Ақындар орталығының тәрбиеленушілері. Қазір аталған ұйымда 40-тан аса ұл-қыз ұлттық өнердің қыр-сырын меңгеріп жүр. Олардың 5-еуі айтыскерлер сыныбына барады. Суырып салма ақындар аз уақыттың ішінде қарым-қабілеттерін шыңдап, Көкшетаудағы Алаш партиясының 100 жылдық мерейтойына арналған додада жүлде иеленген.
Аманжол Зағыпар – облыстық “Ақындар орталығы” айтыскерлер сыныбының жетекшісі:
– Бұл біздің алғашқы жеңісіміз. Небәрі 2-3 айдың ішінде осындай табысқа жетіп отырмыз. Жеңісіміз барлық облыстың қуанышы деп білеміз.
Енді, қарашаның 29-ы күні оқушылардың айтысы Петропавлда өтеді. Додаға көршілес қос өңірдің ұл-қыздары қатыспақ.
Байболат Култанов