Тіпті, айналаға шашылған мал өлікселерін де көзіміз шалды. Мұнда қоқысты Бескөл, Бәйтерек және Элитное селосының тұрғындары әкеледі екен. Адамдардың өз қолымен жасаған сұрықсыз картинаны республикалық “Петропавл-Жезқазған” тас жолымен қатынаған жолаушыларға жақсы байқауға болады.
Бұл экологиялық жағдай жайлы Қызылжар ауданы әкімдігі хабардар. Олар өзекті мәселені 2-ші жыл шешуге ниетті. Жуырда осы тақырып төңірегінде жиын да өткізіліпті. Қазір жобалық-сметалық құжаттар әзірленіп, қоқыс алаңын заңдастыру ісі жүзеге асуда. Дегенмен, бұған экологтар қарсы. Олар маңдайда егістік алқаппен қалың ағаш өскендіктен қалдық төгетін жер болмауы керектігін алға тартқан.
Ербол Багенов – Бескөл ауылдық округының әкімі, Қызылжар ауданы:
– Былтыр Бескөл ауылындағы тұрмыстық қалдықтар полигоны жабылды. Ол өзінің қорын түгелімен тауысты. Содан кейін, Элитное селосы маңындағы тас жол бойынан 4 гектар қоқыс алаңын ұйымдастырдық. Қазір керексіз заттарды лақтыратын жердің аумағы 8 гектарға өсті. Экологиялық нормаларға байланысты полигонды былтыр заңдастыра алмадық. Биыл қайта құжаттарды жинаймыз. Бюджетке өтініш берілді.
Бұл істі бір жақты ету үшін 2 млн 250 мың теңге қаржы қажет екен. Айта кеткен жөн, жыл басынан Бескөл ауылдық округында апаттық қоқыс полигондарынан 20 тонна қажетсіз зат жойылыпты.
Байболат Култанов