Бірнеше шараларды өткізіп, талай аудиторияның ықыласына бөленіп жүрген ұйымдастырушылар мен жүргізушілер бүгін ерекше қобалжу үстінде. Өйткені, бұл – олардың шығармашылығы сыналатын сайыс. Сондықтан, Мамлют ауданының намысын қорғамаққа келген Ерғали Зиябек пен Марат Кәрімов жарысқа тыңғылықты дайындалыпты.
Ерғали Зиябек – Мамлют ауданының мәдени орталығының әдіскері:
– Бұл сайысқа «Хохотушкиндер – қонақта» деген бағдарламаны алып келдік. Біз тек сайқымазақ рөлін ғана сомдамай, көрермендермен де жұмыс жасаймыз.
Сайқымазақтардың киімін киіп келген жұп жұртшылықтың ерекше назарын аударып, аудиториямен тез-ақ тіл табысып кетті.
Жалпы мұндай шаралар екі жылда бір рет өткізіліп тұрады. Ондағы мақсат – жүргізушілер мен мәдени шараны ұйымдастырушылардың басын біріктіріп, тәжірибе алмасу.
Жарқын Жұпархан – Облыстық халық шығармашылығын дамыту орталығының қызметкері:
– Мәдени салада жүргендер өздері ойын-сауық бағдарламаларды ұйымдастырады. Танымал адамдардан тәжірбие алады. Алда көптеген мерекелер күтіп тұр. Соларды қаншалықты қызықты өткізу керектігі де үйретіледі.
Жалпы байқауға 13 аудан мен облыс орталығының өнерпаздары қатысты.
Магжан Ахмадина