Нәзік жандың бизнесі халыққа қызмет көрсетумен байланысты. Нақтырақ айтқанда, жастар сүйсініп жейтін “Гонконг вафлиі”-нің дүңгіршегін ашып, тәтті-дәмділер әзірлейді. Қыркүйектің аяғында пайда болған саудан нысанының бүгінде қалада екеуі бар екен.
Наталья Танкина – “Танкина” ЖК директоры:
– Біз “Ауыл шаруашылығын қаржылай қолдау қоры” АҚ-ы арқылы 5 жылға 3 млн теңгенің несиесін рәсімдедік. Жылдық мөлшерлемесі – 6 пайыз. Бұл өте тиімді. Қазір 4 адамды жұмыспен қамтып отырмын. Несиеге ай сайын 70 мың теңгеден төлеймін. Алдағы уақытта бизнесімді кеңейтпек ойдамын.
Ал Бескөл ауылындағы “Қызылжар” ЖК директоры Айбек Рамазанов ата-кәсіпті қолға алыпты. “Ауыл шаруашылығын қаржылай қолдау қоры” арқылы 4 жыл бұрын 6 пайыздық мөлшерлемемен 1 млн теңге несие рәсімдеген. Ол қаражатқа 3 бас жылқы сатып алыпты. Биелерді сауып, қымызын және етін саудалап кәсібін өрге домалатуда.
Айбек Рамазанов – “Қызылжар” ЖК директоры, Қызылжар ауданы:
– Осы жылы мен 3 млн теңге несие рәсімдедім. Оған тағы 10 бас жылқы алдым. Бұрын 3 жылқы алып, оны 10-ға дейін жеткіздім. Қазір барлығы 20 Қамбар ата төлі бар.
Қазір кәсіпкер Айбек Рамазанов 2 адамды жұмыспен қамтып отыр.
Жалпы “Ауыл шаруашылығын қаржылай қолдау қоры”-ның жергілікті филиалы жыл басынан бері “Жұмыспен қамтудың жол картасы” бағдарламасы аясында жиынтық құны 917,1 млн теңге болатын 378 жобаны қаржыландырған. Оның 49 пайызы – мал шаруашылығын дамыту, 30-ы – қызмет көрсету саласы, 5-уі өсімдік шаруашылығына қатысты.
Сәния Таутекенова – “Ауыл шаруашылығын қаржылай қолдау қоры” АҚ СҚФ несие бойынша менеджері:
– Қазіргі таңда қор филиалы “50 елді мекен” тұжырымдамасын дамыту аясында жеке қосалқы шаруашылықты жетілдіруге өтініштерді қабылдап жатыр. Нақтырақ айтқанда, “Береке” бағдарламасы бойынша бордақылау алаңын құруға 6 пайыздық мөлшерлемемен 5 жылға 4 млн теңгеге дейін несие беріледі. Ал “Ырыс” бойынша, яғни сүтті бағыттағы мал шаруашылығын дамытуға 7 жылға 5 млн теңгеге дейін несие рәсімделеді.
Жыл басынан аталған қор арқылы қаржыландырылған жобалардың ең көбі облыс орталығында екен. Олардың саны – 36.
Риат Шони