Сайыстың алғашқы кезеңі сырттай өткен. Оған өңір аудандарынан 77 адам қатысып, эссе жазыпты. Соның ішінен, 42 үміткердің жұмысы жоғары бағаланып, ақтық сынға қатысуға мүмкіндік алған.
Гүлдәрия Сабырова – Айыртау ауданындағы Сырымбет орта мектебінің ұстазы. 2 жылдық еңбек өтілі бар жас маман биылғы жарысқа бірінші рет қатысуда. Ол байқауға үлкен дайындықпен келіп отыр.
Гүлдәрия Сабырова – Сырымбет орта мектебінің қазақ тілі және әдебиеті пәні мұғалімі, Айыртау ауданы:
– Бүгінгі облыстық байқаудың ең бірінші кезеңінде – таныстырылым. Мұнда біз тіл туралы ақын-жазушыларымыздың жазған толғаныстарынан үзінді оқимыз. Екінші кезеңде тест тапсырамыз. Авторлық бағдарлама қорғау сайысында мен өзімнің “Әдебиеттің құндылығы” курсын қорғаймын. Сырымбет орта мектебінде білім алатын оқушыларға арнап, туған өлкенің ақын-жазушыларын, сал-серілерін және т.б. бір жыл көлемінде оқытып, меңгертемін. Сол курсымды қорғаймын.
Бүгінгі облыстық “Жүзден жүйрік” байқауында қатысушылардың кәсіби шеберлігі 3 кезең бойынша сыналады. Үміткерлер қазақ тілі және әдебиеті пәнінің теориясын біліп қана қоймай, оны әдістемемен сабақтастырып, жетілдіре білу керек, – дейді сайысты ұйымдастырушылар.
Балғаным Оспанова – “Өрлеу” БАҰО” АҚФ “СҚО ПҚ БАИ” аға оқытушысы:
– Жалпы байқаудың басты мақсаты – жаңартылған білім беру мазмұнын жүзеге асыруға жағдай жасау. Сондай-ақ, қазақ тілі және әдебиеті пәні мұғалімдерінің кәсіби шеберліктерін дамыту.
Байқау нәтижесі бойынша сайыстың жеңімпазы мен жүлдегерлеріне диплом, алғыс хат және сертификат табысталмақ.
Тоғжан Ақмағамбетова