Алғашқы раундта қос қарсылас тең түсті. Бірақ, екінші кездесу басталысымен көк бұрыштағы Ақниет Базарбаев көп созбай қарсыласын соққының астына алып, жерге құлатты. Сөйтіп, жеңісті қанжығасына байлады. 22 жастағы спортшы жекпе-жекпен 6 жылдан бері айналысып жүр. Түрлі облыстық жарыстардың жүлдегері.
Ақниет Базарбаев – жарысқа қатысушы, Қызылжар ауданы:
– Осы жарысқа дайындалып жатқаныма 1-ай болды. Жарыс өте тартысты өтуде. Қарсыластарым мықты. Қолымнан келгенді істеймін.
Бұл жарысқа өңірімізден 40 спортшы қатысуда. Олардың салмақтары 50 келіден 90-ға дейін. Аралас жекпе-жек өнері түрлеріне көптеген ұрыс техникалары кіреді. Сол себепті, аталмыш спорт түрінен өтетін сайыстарға жасы 18-ге толғандар ғана қатыстырылады.
Арман Тайбөпенов – жарыстың бас төрешісі:
– Облыс орталығының намысын Әскери институттың курсанттары мен ұлттық спорт түрлері бойынша балалар-жасөспірімдер спорт мектебі, “Намыс” және “Сұңқар” клубтарының шәкірттері қорғауда.
Айта кеткен жөн, жеңіске жеткен қатысушылар республикалық жарысқа жолдама алмақ. Дүбірлі дода қараша айында Алматы қаласында өтпек.
Тоғжан Ақмағамбетова