Қызылжар ауданында жарымжан балаларға арналып күзгі бал өтті

МТРА жаңалықтары

13:53 20 Қазан 2016

Олардың арасында 12 жасар Бекжан Журабай да бар. Оны бүгінгі шараға Бәйтерек ауылынан әжесі алып келіпті. Жасөспірім туа бітті эпилепсия дертіне шалдыққан. Қазір Бекжан – 6-сыныптың оқушысы. Бірақ, өкінішке қарай мектепке бармайды. Мұғалімі үйде оқытады екен. Бүгін күзгі балға келген ол бойын жазып, өзге балалармен ойнап бір қуанып қалды.

Бекжан Журабай – бірінші топ мүгедегі:

– Осы баллға шақырды. Мен осында келіп отырмын. Мүгедектер күні болды. Соған орай маған планшет сыйлады. Мен қатты қуандым.

Қызылжар ауданының орталығында өткізіліп жатқан шараға 5 пен 17 жас аралығындағы мүмкіндігі шектеулі 18 бала шақырту алған. Оларға арналып дастархан жайылды. Әрқайсысына тәтті базарлықтар мен сыйлықтар да үлестірілді.

Нұрлан Сұлтанғазиев – Қызылжар аудандық жұмыспен қамту және әлеуметтік бағдарламалар бөлімінің басшысы:

– Бүгінгі біздің іс-шарамыз бірінші емес. Жыл бойы біз әр түрлі іс-шаралар өткіземіз. Қалалық театрларға, аквапарктарға апарып тұрамыз. Сондай-ақ, осы айлықтың ішінде жағдайы төмен 4 балаға планшет әкімнің атынан сыйланды.

Бүгінде Қызылжар ауданында мүмкіндігі шектеулі – 288 және 136 мүгедек бала бар.

Тогжан Акмагамбетова