Биыл СҚО-да 2 мың 502 мектеп түлегі ҰБТ тапсырады

Білім

14:54 2 Маусым 2016

Маңызды сынақтың тиісті дәрежеде өтуі бүгін пысықталды. Университет алдында ата-аналар мен түлектерді қолдауға келгендерге арнайы орындықтар жайғастырылған. Сондай-ақ, сынақ өтіп жатқан аудиториядан тікелей байланыс болады деп жоспарлануда. Жалпы биыл өңірде 2 мың 502 мектеп түлегі таңмен таласа тұрып, ҰБТ-ы тапсырады.

Анар Волкова – СҚО білім басқармасының бас маманы:

-ҰБТ өтетін барлық қосындар дайын. Облыс бойынша 65 бейнекамера, 7 бейнетіркегіш пен 47 байланыс бәсеңдеткіш орнатылды. Университетте 2 металл іздегіш жақтау қойылды. Петропавл қаласында маңызды сынақты Қызылжар, Мамлют және Аққайың аудандарының түлектері тапсырады. Биылғы жылы ҰБТ-ға өзгерту енгізілген жоқ. Тек сынақтан сүрінгендер оны тамыз айында қайта тапсыра алады.

Әбу Досмұхамбетов атындағы облыстық дарынды балаларға мамандандырылған гимназия-интернатының биылғы түлектері маңызды сынақты үшінші лекте, яғни маусымның 7-сі күні тапсырады. Мұнда таудай талабы бар 38 дарынды оқушы ҰБТ-ға қатыспақ. Бүгінде білім ордасында түлектер күні-түні кітаптан бас алмай сынаққа дайындалу үстінде. Былтырғы жылғы ҰБТ-ның нәтижесі бойынша аталмыш мектептің оқушылары орташа алғанда 100 ұпай жинаған.

Айғаным Ұланова – Ә.Досмұхамбетов атындағы облыстық дарынды балаларға мамандандырылған гимназия-интернатының оқушысы:

-Мен ҰБТ-ға дайындықты былтыр бастадым. Ең әуелі тарихтан білімімді шыңдадым.

Нарғыз Рахымкерей – Ә.Досмұхамбетов атындағы облыстық дарынды балаларға мамандандырылған гимназия-интернатының оқушысы:

-Жалпы барлық сұрақтар қиын болады деп ойлаймын. Негізі мен үшін таңдаулы 5-ші пәнін оңай болады деген сенімдемін.

Өңірімізде маусымның 3-і мен 7-і аралығында өтетін Ұлттық Бірыңғай тестілеу 8 қосында ұйымдастырылады. Жоғары оқу орнына түсемін деген түлектер, кемінде 50 ұпай жинауы керек. Ал ұлттық университетте білім алғысы келетіндердің көрсеткіші 70 балдан төмен болмауы қажет.

Риат Шони

Бұдан әрі оқыңыз

Химия-биология бағытындағы НЗМ аккредитациядан өтті
Химия-биология бағытындағы НЗМ-де ашық есік күні өтті
“Адал ұрпақ” клубтарының белсенділері бас қосты
49 студент шетелде өткен өндірістік тәжірибеден оралды
Техникалық маман иелерінің үздігі анықталды
Оқушылар “Жас ұлан” ұйымына қабылданды
Өңір колледждерінде парасаттылық пен адалдық сағаты өтті
Жергілікті жастар кәсіби шеберлік сайысынан үш жүлдемен оралды
Пәнаралық олимпиаданың қалалық кезеңі өтуде