Жыл сайын көктем мезгілінде аталған жолдарда ірі габаритті және ауыр жүк көліктерінің жүруіне уақытша маусымдық шектеу енгізіледі. Бұл асфальт бетін бүлдірмеу үшін қолға алынатын шара. Қозғалыс шектеуі 1, 2 және 3 білікті ауыр жүк көліктеріне ғана қатысты.
Андрей Марков – СҚО бойынша көліктік бақылау инспекциясының бөлім басшысы:
– Министрліктің бекіткен бұйрығы бойынша 2 білікті көліктегі жүктің салмағы 18 тоннаға дейін болса, ал 3 осьті көлікте 25 тоннадан асып кетпеуі қажет. Бұған жүк көліктерінің “Камаз”, “Урал”, “ЗИЛ”, “ГАЗ” және “Газель” маркілерін жатқызуға болады. Солтүстік, Шығыс, Батыс Қазақстан, Ақтөбе, Қарағанды, Ақмола мен Павлодар облыстары 4-ші жол-климаттық аймағына жатады. Аталған шектеулер халықаралық келісім негізінде жүк тасымалдайтын, жолаушылар және халық тұтынатын тауарлар, дәрі-дәрмек жеткізетін және гуманитарлық көмек көрсетуге бара жатқан жүк көліктеріне қатысты емес.
Қазақстандық және шетелдік жүк тасымалдаушылардың өңірдің республикалық маңыздағы жолдарында көктем уақытында ешбір кедергісіз жүріп-тұрулары үшін арнайы рұқсат құжаттары болуы керек. Былтыр жергілікті көліктік бақылау инспекциясы үлкен көлікпен жүк тасымалдайтын жүргізушілерге 1200-ден астам рұқсат қағазын берген.
Андрей Марков – СҚО бойынша көліктік бақылау инспекциясының бөлім басшысы:
– Жыл басынан 75 рұқсат қағазы берілді. Жүргізушілер тиісті құжатты алу үшін электрондық Үкімет порталы мен жергілікті Халыққа Қызмет көрсету орталықтарына барып өтініш берулеріне болады. Облыста заң бұзған жүргізушілерді анықтайтын 2 бекет жұмыс істеп тұр. Біріншісі – жылжымалы пункт өңір аумағындағы тас жолдарда тексеріс жүргізеді. Ал екіншісі – Новосібір-Челябі тас жолының 594-ші шақырымында орналасқан “Мамлютка” өткізу бекеті.
Қажетті құжатсыз көлік тізгіндеген жүргізушілер мен тауар иесіне деген заң талабы қатаң. Егер рөлде отырғандар заңды бұзса Әкімшілік құқықбұзушылықтар кодексіне сәйкес – 1000, ал жүктің иесі 100 АЕК мөлшерінде айып төлеуге міндеттеледі. Маусымдық шектеу жайлы жүргізушілер хабардар.
Альберт Баинбаев – жүк көлігінің жүргізушісі:
– Менің көлік тізгіндегеніме 20 жылдай болып қалды. Өз басым тас жолда маусымдық жүру талаптарын сақтаймын.
Юрий Эйзенбарт – жүк көлігінің жүргізушісі:
– Көлігім 20 тоннаға дейін жүк тасымалдауға қауқарлы. Маусымдық көлік қозғалысы шектеуін бұзған кезім болған емес.
Былтыр көтемгі маусымда инспекция мамандары ортақ тәртіпті елемеген көлік жүргізушілерге қатысты 5 әкімшілік іс қозғап, 2 миллион теңгенің айыппұлын өндіріп алған.
Бакыт Садуакасов