Мекеме тәрбиеленушілері түрлі деңгейдегі жарыстарда жоғары ұпай жинап, жеке қоржындарын жүлделермен толықтырды. Бұрынғы бірінші орындарын сақтап қалған олар бапкерлерінің үмітін ақтады. Осы еңбегі үшін бүгінгі салтанатты жиында спортшыларға “ҚР-ның велосипед спорты федерациясының” облыстық филиалы атынан алғыс хат, грамота және ақшалай сыйақы табысталды.
Жиын барысында, әсіресе, “Vino 4-ever” клубының капитаны Александр Шушемоин мен спортшылар Жандос Бижігітов, Александр Овсяников, Никита Кабачек, Олег Земляковтың есімі бірнеше рет аталды. Себебі, олар ТМД елдері мен АҚШ-та өткен сайыстарда үзеңгілестеріне дес бермей, лайықты бәсекелестік танытты. Салтанатты отырыста А.Винокуровтың ізбасарларына кәсіпқой спортшыларға арналған жейде мен Олимпиада чемпионының қолтаңбасы қойылған жерлесіміз жайлы кітап сыйланды.
Владимир Парахин – велосипед спорты бойынша балалар мен жасөспірімдерге арналған олимпиада резерві спорт мектебінің директоры:
– Бүгінде споршыларды 7 бапкер шынықтырады. Өңірімізде осы спорт түрімен 142 адам кәсіби түрде айналысуда. Оның 7-уі ҚР-ның спорт шебері дәрежесін алған. Қалғандарында 1-ші, 2-ші разряд. Үстіміздегі жылы 5 жерлесіміз ҚР спорт шебері дәрежесін алды.
Халықаралық дәрежедегі спорт шебері Олег Земляков үстіміздегі жылы Франция, Румыния, Болгария елдерінде өткен халықаралық жарыстарда жақсы нәтиже көрсетті.
Олег Земляков – велосипед спортынан халықаралық дәрежедегі спорт шебері
– Биылғы жарыстар өте ауыр болды. Өйткені, сайыс болған қалаларда ауа-райы құбылмалы болды, тіпті қар аралас жаңбыр жауды. Осыған қарамастан мен бапкерлерден үйренген әдістерімді дұрыс пайдаланып, жеңіс тұғырынан көріне білдім.
Биылғы маусымда “Vino 4-ever” клубының спотшылары халықаралық сайыстарға қатысып, 422 ұпай жинады. Соның 186 ұпайы Олег Земляковтың еншісінде. Қазіргі таңда ұпай саны бойынша Қазақстан Азия құрамалары ішінде 2-орынға тұрақтады. Бұл қарқыннан жерлестеріміз таймаса Рио-де-Жанейро-2016 Олимпиадасына 2 лицензия ұтып алу мүмкіндігі бар. Осы күні маңызды сайысқа қатысатын спортшылардың есімі анықталу үстінде.
Берік Қасен
>Култанов Байболат