Жігіттермен қатар сахна төріне ару қыздарымыз да шықты. Тіпті, кейбіреуі құрама капитандары да болып сайланған. Мәселен, «Теміржол серпін жастары» командасындағы мына нәзікжанды тұтас бір топқа жетекшілік етіп отыр.
Гүлнәр Есбатырова – Петропавл теміржол колледждінің студенті:
– Бүгінгі фестивальге біз өте қысқа уақытта дайындалдық. Әзілдеріміз біздің студенттік өмірімізден алынған. Ол – Оңтүстіктен Солтүстікке келуіміз, жатаханадағы өміріміз. Көбіне, бұл – басымыздан өткен қызықты оқиғалар.
Бұл шараға колледж студенттерінен құралған 4 команда қатысты. Барлығы да оңтүстік аймақтан «Серпін-2050» бағдарламасымен келгендер. Өңірімізге білім қуып, өнерді де қатар алып жүретін жастар арасында мұндай шаралар жиі ұйымдастырылады екен.
Алма Хусаинова – СҚО білім басқармасының бөлім басшысы:
– Негізі, «Серпін-2050» жобасы аясында келген студенттерге біз түрлі жиындар ұйымдастырамыз, сайыстар өткіземіз. Барлығының басын жиі қосуға тырысамыз. Бүгінде біздің облысымызда аталмыш бағдарламамен оқуға келген 665 студент білім алуда. Оның 249-ы өңір колледждеріне түскен.
Фестиваль соңында қатысушыларға кубок және дипломдар табыс етілді.
Айгерим Ержанова