Осы автобустардың жүргізушілері жол қоғалысы кезінде жиі заңбұзушылықтарға жол береді. Сондықтан, жолаушылардың қауіпсіздігі әкімшілік полиция қызметкерлерінің қырағы назарында.
Шәмшіден Ақышев – Петропавл қалалық ІІБ әкімшілік полиция бөлімі бастығының орынбасары:
– Полицейлер адам тасымалымен айналысатын қоғамдық көліктерді тексердік. Нәтижесінде көлік басқару кезінде заңбұзушылықтарға жол берген бірнеше автобус жүргізушілері анықталды.
Рейд барысында полицейлер жол жүру ережесін өрескел бұзған нөмірі 19-шы бағыттағы автобусты анықтады. Қоғамдық көліктің жүргізушісі дөңгелегі әбден тозса да жолаушыларды тасымалдаумен айналысқан. Ал бұл тұрғындардың өміріне үлкен қауіп төндіреді.
Осылайша, екі күннің ішінде 9 бағытта жүретін автобустар тексеріліп, 37 заңбұзушылық анықталған. Сондай-ақ, жүрізушілерге техникалық ақауы бар көлікті басқарғаны үшін 24 хаттама толтырылыпты. Машинаны жүргізіп келе жатып ұялы телефонмен сөйлесуге қатысты – 4, қауіпсіздік белдігін тақпаған 3 жүргізушіге әкімшілік хаттама рәсімделген.
Бақыт Сәдуақасов