Дәл қазір залға көлік және жол құрылысы саласының мамандары жиылған. Барлығы Елбасы бекіткен “100 нақты қадамдағы” жол саласына қатысты тұстарды талқылауда. Жалпы республика бойынша 11 келелі жоба іске асырылып, нәтижесінде 7 мың шақырым жол жөнделмек. Оған жұмсалатын қаржы – 2,4 триллион теңге. Мысалы, бүгінде Петропавл арқылы өтетін Астанадан Ресей шекарасына дейінгі магистраль жөнделуде.
Амангелді Беков – ҚР индустрия және даму министрлігі автомобиль жолдары комитеті төрағасының орынбасары:
-Биылғы қаржыландыру көлемі 11 миллиард теңгеден асты. Жұмыс 106 шақырым бойында жүріп жатыр. Жыл соңына дейін 55 км-ді тапсырамыз деп жоспарладық. Ал бөлінген қаржы жеткілікті болса, келер жылы Петропавл қаласына дейінгі аралықты аяқтап, кейін тас жолды Қорғанға қарай жөндей бастаймыз.
Республикалық маңыздағы жолды жаңғырту жұмыстары осыдан 4 жыл бұрын басталған. 60-80 жылдары тартылған магистральді жөндеу тек 2018 жылы ғана аяқталмақ. Республикалық маңызы бар трассаның біздің облыстағы ұзындығы 325 км-ді құрайды.
Алмаз Ыдырысов – «ҚазАвтоЖол» СҚОФ директорының орынбасары:
-СҚО шекарасынан Келлеровкаға дейінгі аралықта жол қайта жөндеуден өтті. Бүгінде Келлеровка мен Петропавл аралығы жөнделуде. Мердігерлер анықталды, қаржыландыру бар, 300-ден астам техника мен 1000 шақты жұмысшы тартылды. Құрылысқа керекті материалдар негізінен Көкшетаудан жеткізілді.
Жұмыс сапасы үнемі мамандардың қатаң бақылауында. Жөндеуден кейін жол екінші техникалық дәрежеге ауыстырылмақ. Яғни, ұзындығы 9 метрді құрамақ. Жалпы өңіріміздегі республикалық маңызы бар жолдардың ұзындығы 1400 шақырым. Тағы облыстық 2400 км жол бар. Жалпы биыл республикалық және облыстық бюджеттерден жол жөндеу жұмыстарына 5 миллиард 200 млн теңге бөлінген.
Бейбіт Есманов – СҚО жолаушылар көлігі және автомобиль жолдары басқармасының басшысы:
-Петропавлда көшелерді жөндеу жұмыстары да жүріп жатыр. 250 км-ді жаңарту үшін 2 миллиард теңге бөлінген. Жұмыс әлі де жалғасуда.
Сонымен қатар, СҚО-нда әуежайды жаңғырту шаралары да басталды.
Айгерим Ержанова