Бұл баға жетпес суреттерді кітапхана мұражайына әкелген журналист Шашубай Малдыбаев. Әкесі Ғалым Малдыбаев кезінде Сәбит Мұқановпен араласып, етене жақын болған екен. Тапсырылған суреттерді зейнеткер отбасылық мұрағаттан алған көрінеді. Бірі – Сәбит Мұқановтың Қызылжар қаласында 1928 жылы мұғалімдік қызметте жүрген кезіндегі түскен суреті болса, екіншісі – Мәскеу қаласында өткен қазақ өнері мен әдебиетінің онкүндігінде түсірілген сурет. Сондай-ақ мұнда Ғалым Малдыбаевтың Сәбит Мұқановтың “Аққан жұлдыз” романының 2-ші кітабына арнап жазылған диплом жұмысы да бар.
Кітапхана ішіндегі әдеби-мемориалдық мұражайда – Сәбит Мұқановтың қазақ және орыс ақын жазушыларымен түскен суреті, жазушының тұрған үйінің макеті мен шығармалары жайғастырылған. Мұражайдың тұсауы 1980 жылы кесіліпті. Ал бүгін сыйға тартылған 2 сурет пен дипломдық жұмыс мұражайдың көркін одан бетер аша түспек.
Сондай-ақ жерлес жазушының құрметіне орай жыл сайын облысымызда Сәбит Мұқанов оқулары өтіп тұрады.
Бақыт Сәдуақасов