Жергілікті футбол командасының ойынын тамашалауға облыс әкімі Самат Ескендіров келді. Осы жолы петропавлдық “Қызылжар-СК” командасы өз алаңында қарағандылық “Гефест” құрамасын қабылдады. Ойынның алғашқы минуттарында-ақ қызылжарлық шабуылдаушы Эльдар Аитов қонақтардың қақпасына алғашқы голды соқты.
Кейін екі жақтың аяқдоп шеберлері соққы жасағанымен, допты қақпаға дарыта алмады. Тек ойынның 34-ші минутында қарағандылық аяқдоп шебері Айдос Таттыбаев есепті теңестірді.
Осылайша бірінші тайм 1:1 есебімен аяқталды.
2 таймда жергілікті аяқдоп шеберлері қарсы қақпаға бірнеше рет соққы жасап, оның біреуі нәтижесін берді. Дегенмен қонақтар да ұтымды сәтті дер кезінде пайдаланып, қақпаға өз доптарын кіргізді. Сөйтіп, есеп қайта теңесті.
2 таймның аяқталуына аз уақыт қалған кезде қарағандылықтар алаң иелерінің қақпасына тағы бір гол салды. Нәтижесінде 3:2 есебімен “Гефест” командасы жеңіске жетті.
Кирилл Кекер, “Гефест” футбол командасының капитаны, Қарағанды қаласы:
-Барлық командалардың дайындық деңгейі жоғары. Сондықтан да кездесу оңай болған жоқ. Алда әлі кездесулер бар. Сол ойындарда жеңіске жету керек.
Енді мамырдың 31-і күні “Қызылжар-СК” командасы өз алаңында теміртаулық “Болат АМТ” құрамасымен тартысқа түспек.
Бақыт Сәдуақасов
style=