Ғылыми жоба тақырыбы “Заманауи киім үлгілерін ұлттық нақышта безендіру” деп аталады. Мұнда қазақстандық оқушылардың бірыңғай мектеп формалары мен сәнді көйлектердің үлгілерінің сызбасы көрсетілген. Барлық киімдер қазақтың ұлттық ою-өрнегімен безендірілген. Бұл ғылыми жобаның авторлары №7 орта мектептің 8 сынып оқушылары Ангелина мен Юлия. Олар осы еңбектерімен қалалық сайыста 2-орынды жеңіп алыпты. Енді оқушылар өз бақтарын сәуірдің 6-сы мен 13-і аралығында өтетін республикалық инновациялық жобалар байқауында сынап көрмек.
Ангелина Олесеюк, №7 орта мектептің 8 сынып оқушысы:
– Қазақстан тарихы сабағында біз қазақ халқының ою-өрнектері жайында жиі айтамыз. Сондықтан маған мектеп формасы мен сәнді көйлектерге ою-өрнекті қоса тігіп, безендіру идеясы келді. Біз Қазақстанда тұратындықтан өзге елдерден айрықшаланып тұруымыз қажет сияқты. Осы ою-өрнекпен тарихымызды оқушылардың арасында кеңінен насихаттай аламыз.
Бұл жобада оқушылардың бірыңғай мектеп формасы және сәнді киімдердің 20 үлгісінің сызбасы көрсетілген. Барлығы қазақтың ою-өрнегімен безендіріліп сызылған.
Юлия Дроздецкая, №7 орта мектептің 8 сынып оқушысы:
– Біз өз киім үлгілерімізді қазақтың ою-өрнегімен безендіре отыра жасыл, көк, күлгін және қара түстерді пайдаландық. Яғни, бастауыш, орта және жоғарғы сынып оқушыларының мектеп формасы осындай түстерде болады.
Жобаның жетекшісі – Наталья Яворская. Тарих пәнінің мұғалімі мақсатқа жету үшін 1 жыл уақыт жұмсағандығын айтады.
Наталья Яворская, №7 орта мектептің тарих пәнінің мұғалімі:
– Қазақтың ұлттық ою-өрнегі – біздің құндылығымыз. Сондықтан оқушылар өз жобаларын терең зерттеді. Сөйтіп, көйлектердің жағасы мен жеңі, юбкалардың етегі және белбеулерді ұлттық ою-өрнекпен безендіріп, біріңғай мектеп формасынның үлгілерін жасады.
Бұдан кейін Ангелина мен Юлия “ҚР мектеп формаларының киім үлгілері” атты сайтты ашуды жоспарлап отыр.
Бану Ахметова