Жыл басынан медициналық және фармацевтикалық қызметті бақылау комитеті СҚО бойынша департаментінің мамандары 35 тексеріс өткізген. Заңға қайшы 51 жағдай орын алыпты. Мамандар негізді шағымның биыл 2 есеге артқанын айтып отыр. Тұрғындарды көбіне емдеу сапасы мен дәрі-дәрмекпен қамту жайы қынжылтады екен. Сондай-ақ, көбінің терапевт, хирург, акушер-гинеколог және педиатрдың жұмысына көңілдері толмайды.
Ағаршын Рашева, медициналық және фармацевтикалық қызметті бақылау комитетінің СҚО бойынша департаменті басшысының орынбасары:
-Мәселен, науқас адамды жедел жәрдем қызметі облыстық ауруханаға жеткізіпті. Дәрігерлер оны 3-ші қалалық ауруханаға жөнелткен. Ал, ондағы дәрігерлер басқа диагнозбен кардиологиялық орталыққа жібереді. Осылайша, 1 тәулік уақытын зая кетіріп алған науқас қажетті емін ала-алмай көз жұмды.
Бұл денсаулық саласындағы бір ғана заң бұзушылық емес. Медициналық мекемелерді тексерудің нәтижесінде 1 млн теңгеден артық айыппұл өндіріліп, кінәлі азаматтар жауапқа тартылған.
Ағаршын Рашева, медициналық және фармацевтикалық қызметті бақылау комитетінің СҚО бойынша департаменті басшысының орынбасары:
-Қозғалған қылмыстық іс саны өткен жылмен салыстырғанда 29 пайызға артты. Денсаулық сақтау басқармасы арқылы 6 лауазымды тұлға тәртіптік жазаға тартылды. 6 материал облыстық ІІД-ң тергеу басқармасына, 13-і облыстық прокуратураға жіберілді.
Өкінішке қарай, 3 сәби өлімі тіркелген. Енді екінші жартыжылдықта департамент мамандары 4 тексеріс жүргізбекші. Олар Ғ. Мүсірепов және Тимирязев аудандарына да баруды жоспарлап отыр.
Берік Қасен