Қала көшесі тұнжырап тұр. Мемлекеттік мекемелердегі барлық ту төмен түсірілген. Қазақстан халқы Алматы түбінде апатқа ұшыраған әуе кемесінде болған отандастарын аза тұтуда. Иә, соңғы 2 айда көк ту 2-ші рет төменге түсірілді. Жергілікті халық марқұмдардың туған-туыстарына көңіл айтуда. Олар мұндай қасірет енді аспанымызға төнбесін деп тілейді.
– Өте қайғылы жағдай. Баршамызға ауыр тиеді. Туған-туыстарына бекем болыңыздар деп айтқым келеді.
– Әрине, бірге қайғырамыз. Осымен 2-ші рет қайғылы жағдай болып жатыр. Өте ауыр жағдай.
Барша қазақстандықтар марқұмдардың туғандарымен бірге қайғыруда. Жалпыұлттық аза тұту күнінде барлық телевизия эфирлерінде ойын-сауық бағдарламалары мен жарнамалар да тоқтатылды.
– Осыдан бірнеше жыл бұрын апаттан менің ағам қайтыс болған. Сондықтан осы адамдардың қайғысын жақсы түсінемін. Қайғысына ортақтасамын.
– Мұндай жағдай елімізде қайталанбасын, мемлекетіміз тыныш болсын дегім келеді.
Инеш Шоқақова