«Орловский» ЖШС қар тоқтатуды желтоқсанда бастапты. Міне, бүгін екінші із салмақшы. Бұл агротехникалық тәсіл егіс алқаптарында ылғал жинау үшін ерекше маңызды. Барлығы 2 700 га аумақтағы егіс жері өңделмек. Алқапта 5 трактор жұмыс істеуде. Механизаторлар құрамы да тәжірибелі. Александр Горенко солардың бірі.
Александр Горенко, «Орловский» ЖШС жұмысшысы:
– Өткен жылы жаңа 8 Беларусь тракторы алынды. Жаңаның аты – жаңа. Жұмыс істеуге қолайлы, жұмыс та өнімді.
Қар тоқтатылған алқаптың әр гектары қосымша 3 центнерден өнім береді екен. Жалпы шаруашылықтың жыл сайын жинайтын астығы жаман емес. Былтыр кейбір алқаптардың гектар берекелігі 30-35 центнерге дейін жетіпті.
Владимир Орловский, «Орловский» ЖШС жетекшісі, Қызылжар ауданы:
– Біз жыл сайын екі ізбен қар тоқтату тәсілін жүргіземіз. Бұл шара жем-азыққа арналған біржылдық шөптерге дейін қолданылады. Өткен жылы «Қазагрофинанс» АҚ арқылы 6 комбайн алдық. Атқарылған істеріміз мол әрі сапалы астық алуға мүмкіндік береді деген ойдамыз.
Қызылжар ауданында 69 ЖШС, 1 командиттік серіктестік және 315 шаруа қожалығы бар. Барлығы 168 мың 200 га аумақта қар тоқтату жұмыстарын жүргізу жоспарлануда.
Мұрат Хұсаинов, Қызылжар аудандық ауыл шаруашылығы және ветеринария бөлімі бастығының орынбасары:
–Бүгінгі таңда 142 мың га қар тоқтатылды. Дәнді дақылдарды өткен жылы гектарынан 19,3 центнерден алдық. Ол агротехникалық тәсілдерді қолданудың арқасында.
Жем-азықтың мол болуы шаруашылық үшін маңызды. Өйткені «Орловский» ЖШС мал шаруашылығы саласын дамытуға да ден қойып отыр. «Сыбаға» бағдарламасы бойынша 60 бас ірі қара алыныпты. 2 қазақтың ақбас бұқасы бар.
Валерий Сычев, «Орловский» ЖШС жұмысшысы:
– Бұл тұқымдас ірі қара біздің климатқа бейімделген. Алғашқы 3 бұзауға күтім жасаудамыз. Сиырларды суық тәсіл бойынша, ағаш қорада ұстаймыз.
Алдағы уақытта мал басын 120-ға дейін жеткізу жоспарда бар.
Инеш Шоқақова