ҚР Тұңғыш Президенті мерекесінің күнтізбеге енуі еліміз үшін үлкен қуаныш. Ол Елбасымыз Нұрсұлтан Назарбаевқа құрмет көрсету, еңбегін мойындау және сенім білдіру дейді жиынға қатысушылар. Дәл 1991 жылдың 1 желтоқсаны күні еліміздің тұңғыш Президенті сайланды. Осылайша тәуелсіз елеміз Ұлт көшбасшысының сарабдал саясатымен талай биіктерді бағындырды.
Таңат Сүгірбаев, «Асыл мұра» орталығының жетекшісі:
– 1991 жылдың 1 желтоқсаны әлі есімізде.Жалпыхалықтық сайлау болды Президентіміздің. Халқымыздың жүз пайызға жақын, 98,7 пайызбен Президентімізді сайлап алған болатынбыз. Бұл – үлкен сенім. Сол кездің өзінде халқымыз Елбасының үлкен жұмыстар атқаратынын, көп жақсылықтар әкелетінін сезген сияқты. Сол сенімді міне 20 жылдан асты Елбасы ақтап отыр.
Бүгінгі күн – ол ертеңгі тарих. Еліміздің тәуелсіздік алғаннан бергі 21 жыл ішінде жеткен жетістіктерінің қайсысы болмасын тікелей Елбасыға байланысты. Мұны бүгінгі жиынға қатысқандар назардан тыс қалдырмады.
Гүлбақша Мұсабаева, М.Қозыбаев атындағы СҚМУ-нің «Құқықтану» кафедрасының доценті:
– Қазіргі уақытта біздің мемлекетімізде саяси дәстүрлер қалыптасып жатыр. Яғни онда біз адамның тарихи ролін бағалаймыз. Осы 21 жыл егемендігіміз тікелей Президенттің тағдырымен байланысты.
Сонымен қатар, дөңгелек үстел барысында «Нұрсұлтан Назарбаев: адам және саясаткер портреті» кітап көрмесі ұйымдастырылды.
Әспет Әбдірешова