Тізе буынындағы шеміршек еттері мен сіңірлері үзілген науқасқа артроскопиялық ота жасалып жатыр. Бұрын ол үшін тізені ашу қажет болатын. Енді арнайы эндоскопиялық құрылғылардың көмегімен операцияны теріні кеспей-ақ жасау мүмкіндігі туды. Бейнекамера орнатылған арнайы аппаратура көріністі 8 есе ұлғайтады. Дәл осы заманауи қондырғылардың арқасында мастер-кластарға қатысушылар астаналық дәрігерлердің ота жасау үрдісін он-лайн режимінде көре алады.
Қуаныш Байкөбесов, № 7 Алматы қалалық клиникалық ауруханасының травматолог-дәрігері:
– Мұндай мастер-кластар жиі өткізілсе дейміз. Кейінгі уақытта телемост арқылы өзіміздің бөлімшеде отырып-ақ көреміз деген ойдамыз.
Жергілікті 3-ші қалалық аурухананың травматология және ортопедия бөлімшесінің құрылғанына 40 жыл. Мұнда білікті мамандар қызмет етуде дейді еліміздің бас сынықшысы Нұрлан Батпенов. Сондықтан 200-ге жуық адам қатысатын жиынның Петропавлда өткізілуі кездейсоқ емес. Бұл өңірімізде соңғы 20 жылдан бері ұйымдастырылмаған конференция.
Нұрлан Батпенов, ҚР ДМ «Травматология және ортопедия ғылыми-зерттеу институты» РМК директоры:
– Ғылыми-зерттеу институты болған соң, өзіміздің ойлап тапқан протезымыз бар.Елімізде 400 адамға салынды. Петропавлда бүгін 1 науқасқа ота жасап, сол протезды салмақпыз.
Жол-көлік оқиғаларының салдарынан жарақат алған тұрғындарға медициналық көмек көрсету, одан қалды ортопедия және жарақаттарды емдеу кезінде инновациялық технологияларды қолдануға үйрету – 2 күнге жалғасатын ғылыми-практикалық конференцияның басты мақсаты осы.
Инеш Шоқақова