Қос құраманың ойыншылары жасыл алаңға ерекше жігерленіп шықты. Себебі бұл кездесуде «Қызылжар» құрамасына турнирлік кестеде алға жылжу үшін ұпай жинау керек болса, «Іле-сәулет» командасының алдындағы міндет – бірінші орынды сақтап қалу. Қарсылас командалар кездесуді бірден тегеурінді шабуылдардан бастады.
Дегенмен бұл кездесуде жергілікті «Қызылжар» командасының қақпасына доп дарыту мүмкін болмады. Себебі «Іле-сәулет» құрамасының әрбір шабуылына жерлестеріміз тойтарыс беріп отырды. Матчтың бірінші таймында командалар есеп айырыспағанымен, екінші таймның 48-ші минутында «Қызылжар» құрамасының жартылай қорғаушысы Евгений Романов қарсылас қақпасына алғашқы голды соқты. Ал қонақтардың қақпасына дарыған екінші доп – «Іле-сәулет» құрамасының абайсызда өздеріне қарай бағыттаған автогол болды. Осылайша, ойын 2:0 есебімен «Қызылжардың» пайдасына шешілді. Келесі ойын қыркүйектің 25-інде өтетін болады. Онда жергілікті команда Аламытының «Қайрат-Академиясымен» кездеспек.
Әспет Әбдірешова