Республикада жылыту маусымына дайындық деңгейі жоғары деді өз баяндамасында ҚР Құрылыс және тұрғын үй-коммуналдық шаруашылық агенттігінің төрағасы. 3085 қазандық дайын. Сондай-ақ тозығы жеткен электр және жылу желілерін жөндеу жұмыстары жалғасуда. Ол жөнінде өңір жетекшілері есеп берді. Біздің облысымызда әлеуметтік нысандарды жылытатын 627 қазандықтың 614-і әзір.
Серік Біләлов, СҚО әкімі:
– Жылыту маусымына дайындық жоспарға сәйкес жүргізілуде. Білім беру нысандары толықтай дайын. Денсаулық сақтау мекемелерінің әзірлігі 99 пайыз. № 2 жылу–электр орталығында 171 мың тонна көмір қоры бар. Сондай-ақ 1,4 мың тонна мазут әзірленді.
Тұрғындар үшін 409 мың тонна көмір қажет. Оны әзірлеу жұмыстары жалғасуда. Тұрғын үйлерді жылыту маусымына дайындауға 2 арнайы кәсіпорынның 15 бригадасы жұмылдырылған.
Антон Федяев, СҚО энергетика және тұрғын үй-коммуналдық шаруашылығы басқармасының бастығы:
– Айыртау, Уәлиханов және тағы бірқатар аудандарда қазандықтарды дайындау жұмыстары жүргізілуде. Бұл істі жылыту маусымына дейін аяқтауды жоспарлап отырмыз. Барлығы 13 қазандық дайын емес.
Бахтияр Қадырханов, СҚО төтенше жағдайлар жөніндегі департамент бастығы:
– Есіл ауданындағы Явленка селосында ескі қазандықтар алмастырылмақ. Дегенмен олардың орнына әлі жаңалары қойылмапты.Сондықтан 1-ші қазанға дейін мұны үлгермеулері де мүмкін.
Облыс әкімі мәселені шешуді облыстық энергетика және тұрғын үй-коммуналдық шаруашылығы басқармасының бастығы Антон Федяевқа тапсырды.
Инеш Шоқақова