Астана! Сен деген туған елдің жүрегісің,
Өзінен бастау алар өрелі ісім.
Шаһарлар толып жатыр, бірақ та сен,
Бәрінен бірегейі, бөлегісің.
Еліміздің бас қаласы – Астана барша қазақстандықтардың мақтанышына, сүйікті қаласына айналған. Әр азаматтың Елордаға деген ықыласы ерекше. Мұны жұртшылықтың елдігімізді ұлықтайтын ерекше мереке күні орталық алаңға бір адамдай жиналуынан-ақ байқауға болады. Бұл жерде таңғы сағат оннан бастап түрлі жарнамалық акциялар өткізілуде. Суреттер байқауы мен көрмелерге қатысамын деушілерге де мүмкіндік зор. Сәулесін шашқан күннің көзі, жарқын түстер және ашық аспан. 4 жасар Фатима Даирова өз суретінде елдегі бейбітшілікті бейнелеуде.
Фатима Даирова:
– Мен күннің көзін салдым. Адамдарды да. Бәрін Астана күнімен құттықтаймын.
Өз қиялдарын қағаз бетіне емес, асфальтта суреттеген бүлдіршіндер де бар. Бәрінің тақырыбы бір – Жас Астананың әсем келбеті. Мұндай байқауға қатысушының ешбірі сыйлықсыз қайтпады.
Ирина Паламарчук, облыстық бейнелеу өнері мұражайының директоры:
– Біз бұл жерде Бәйтеректі, Астана қаласындағы зәулім үйлерді көре аламыз. Балалар өздеріне ерекше ұнаған ғимараттарды суреттейді. Байқауымыз «Астана – балалар көзімен» деп аталады.
Ал ән мен биге жақындар үшін мәдениет және демалыс саябағына кіре берісте «Астана – бас қала» атты балалардың мерекелік бағдарламасы ұйымдастырылды. Жеткіншектердің бірі ән шырқаса, енді бірі жиылған қауымды бимен тәнті етті.
Бұл күні әрбір тұрғын өзіне жақын іс тауып, көтеріңкі-көңіл күйде болды.
–Бүгін біз үшін өте маңызды мереке. Астанаға тек жақсылық тілеймін.
– Астана-бас қаламыз. Ол жылдан-жылға көркейіп келеді.
– Астана күні құтты болсын.
Сондай-ақ мерекеден шет қалмаған жұртшылық қалалық өнер ұжымдары әзірлеген «Әлемге мақтан етемін Астанамды» концертін де тамашалай алды.
Инеш Шоқақова