Баспасөз мәслихатын Петропавл гарнизонының әскери прокуроры Нұрлан Алпысов өткен жылда атқарылған істерді қорытындылаудан бастады. Былтыр гарнизон прокуратурасы барлығы 55 тексеріс жүргізіпті. Соның арқасында 490 заңбұзушылық анықталып, 11 наразылық қанағаттандырылған. Сондай-ақ мемлекетке келтірілген шығынның орны толтырылды.
Нұрлан Алпысов, Петропавл гарнизонының әскери прокуроры:
– Прокурорлық тексерістердің нәтижесінде 135 азаматтың конституциялық құқығы қорғалды. 72 тұлға тәртіптік, 12-сі әкімшілік, 10-ы материалдық жауапкершілікке тартылды. Мемлекет қазынасына 1 млн 400 мың 107 теңге қайтарылды.
Анықталған заңбұзушылақтар қатарында негізінен қауіпсіздік ережелеріне сай еңбек жағдайының жасалмауы, қызметкерлердің тиісті сыйақы алмауы, т.б. бар. Сондай-ақ жиында үстіміздегі жылғы қаңтардың 22-інде күшіне енген рақымшылық заңы туралы да сөз қозғалды. Петропавл гарнизоны бойынша бұл заң аясында 2 әскери қызметкер қылмыстық жауапкершіліктен босатылған.
Нұрлан Алпысов, Петропавл гарнизонының әскери прокуроры:
– Әскери қызметкер Құсмановқа қатысты ҚР ҚК -нің 325-бабының 3-тармағы бойынша қылмыстық іс қозғалған болатын. Оның жасаған қылмысы аса ауыр емес қылмысқа жатады. Сондықтан рақымшылық заңына ілікті. Оған қатысты қылмыстық іс тоқтатылды.Әлі заңды күшіне енген жоқ.
Сондай-ақ гарнизон прокуратурасы жемқорлыққа қарсы күресті жалғастыруда. Өткен жылы бұл індетке қатысты 2 тексеріс жүргізіліп, нәтижесінде мемлекет қазынасына 446 мың 385 теңге қаражат қайтарылыпты.
Инеш Шоқақова