Ауа райын болжау орталығы алдағы күндері ауаның температурасы -33 градусқа дейін төмендейді деген болжам жасап отыр. Осыған орай, төтенше жағдайлар департаменті хабардар етілген. Бірақ, әзірге қаланың сыртына шықпау туралы шектеу қойылған жоқ.
Асхат Бәкішев – СҚО ТЖД төтенше жағдайлардың алдын алу бөлімінің бастығы:
Төтенше жағдайлар департаменті құтқару қызметінің әзірліктерін тексеру туралы нұсқау берді. Көмек қажет болған адамдарды жылы жерге орналастырып, қажетті дәрі-дәрімекпен қамтамасыз ету сияқты іс-шаралар кешенін өткізу жүктеледі.
Жол полициясының қызметкерлері де өз кезегінде, жүргізушілерді аязда жолда қалып қоймау үшін сақтандыруда.
Әбілсейіт Жолаушин – СҚО ІІД ЖПБ инспекторы:
Мұндай жағдайлар орын алғанда біз әрқашан көмекке әзірміз. Жолда көліктерді тоқтатып, республикалық маңызы бар жолдарда тоқтап тұрғандар жайлы сұрастырамыз. Сондай-ақ, адамдарды мүмкіндігінше жылы жерге жеткізуге тырысамыз.
Александр Нескоромный жүздеген шақырымдарды артқа тастаған. Алматыдан Мәскеуге бағыт алған ол күтпеген жағдайларға әрқашан дайынмын дейді.
Александр Нескоромный – жүргізуші:
Мен көп жылдан бері көлік жүргіземін. Алайда мұндай жағдайларға тап болып, жолда қалып көрмеппін.
Аязды күндері диспетчерлік қызмет жұмыс істемек. Ол үшін 112 нөміріне хабарласу керек.