Спорттық шаралар мамырдың алтысынан басталып кетті. Cонымен қатар, мектеп оқушылары мен колледж студенттері Қазақстан Конституциясы және Горький көшелерінің қиылысынан басталатын эстафетаға қатысады. Мамырдың 7-сі шинкиокушинкай каратеден қалалық ашық чемпионат өтеді. Оған көршілес Ресей елінің спортшылары да келмек. Сондай-ақ осы айдың 7-сінен 9-ына дейін ардагерлер арасында шахматтан жарыс ұйымдастырылады. Ал мамырдың 8-і велошабандоздар күштерін сынайтын болады.
Асылбек Тоқбаев, қалалық дене шынықтыру және спорт бөлімінің бастығы:
– 9 мамыр күні Погодин атындағы драма театрының алаңында спорттық іс-шаралар өтеді. Онда шахмат, дойбыдан және қызғылықты спорт түрінен ойындар өтеді.
Мамырдың 7-сі 314-атқыштар дивизиясы ескерткішіне, Жеңіс стелласына және Даңқ обелискісіне гүл шоқтары қойылады. Бұл күні петропавлдықтар түрлі сайыстарға қатысып, мерекелік концертті тамашалау мүмкіндігіне ие болады. Өнер сүйер қауымға мамырдың 8-і сағат 11.00-де С.Мұқанов атындағы қазақ сазды- драма театрының ұжымы Ұлы Жеңіске арналған қойылым ұсынады.
Аян Садаев, қалалық мәдениет және тілдерді дамыту бөлімінің бастығы:
-9-ы күні қала бойынша 3 алаңда дайындалған іс-шаралар өтеді. Театр алаңында сағат 9-да басталады. Мерекелік шеру және де концерттік бағдарлама, далалық асхана болады, сондай бағдарлама Жеңіс саябағында өтеді.
Солтүстікқазақстандықтар Ұлы Жеңіс күнінде Погодин атындағы орыс драма театрында сағат 17.00-де Лаки Кесоглудың жеке концертін көре алады. Ал кешкі сағат 20.00-де Жеңіс саябағында концерттік бағдарлама өтеді. Бұл шарадан кейін сағат 22.00-де отшашу ұйымдастырылады.
Айдана Демесінова