Бәйге десе елеңдеп тұратын жанкүйерлерді жинаған ат жарысқа 50-ден астам арғымақ иесі қатысты. Дүбірлі додаға облысымыздың әр ауданынан ең жүйрік тұлпарлар жиналған. Шабандоздар бәйгенің 7 түрінен сынға түсті.
Серік Біләлов, СҚО әкімі:
– Облысымызда асыл тұқымды жылқы өсіруге байланысты жұмыс атқарылуда. Бәйге басын бермес тұлпарларымыз әр түрлі жарыстарда жеңімпаз танылуда. Шабандоздарға сәттілік тілеймін.
Қазақтың көне ойыны қыз қуу аяқталысымен ауыздығымен алысқан алғашқы 6 арғымақ қатар түзеп, ұшқыр бәйге жарысына шықты. Көрерменнің қолдауымен бәйгеге қосылған «жүзден жүйрік, мыңнан тұлпарлар» желмен жарысып, құйындатты. Нағыз жүйріктердің легі алғашқы айналымдардан кейін байқала бастады. Бірінші айналымда-ақ Артем Погребновтың Дартуары өзгелерден оқ бойы озып, мәре сызығын бірінші болып кесті.
Артем Погребнов, шабандоз:
– Менің қуанышымда шек жоқ. Бұл әлі соңғы жарыс емес, сондықтан бізді талай жеңістер күтіп-ақ тұр.
Әр айналым жеңімпазы бірден дипломмен марапатталып, сыйға ақша алып отырды. Көрермендер қызықты да, тартысты жарыстан көп әсер алды. .
Жанкүйерлер:
-Ат жарысы жақсы. Адамдар ұту үшін емес, қызық үшін келеді.
– Бәйге біздің көне жарысымыз. Осындай жарыстар жиі өткізіле берсін.
– Мен осы жарысты жақсы көремін. Тұлпарлар мықты.
Жарыс қызығы тұлпарлар аламан бәйгеге шыққанда басталды. 10 мың метр қашықтықтан 10 арғымақтың тек 4 ғана мәреге жетті. Өзгелері орта жолда қалды. Бірінші орын Уалиханов ауданына бұйырды. Фигуристка атты сәйгүлік жарыс жолын 13 минут 11,2 секундта бағындырды.
Арман Старцев, шабандоз:
– Жеңгеніме қуаныштымын. Қиын болса да тырыстық. Жарыс алдында көп дайындалдық. Атым жақсы. Бұрындары да талай жеңіс сыйлаған.
Гүлден Сәрсенбаева