Облыстық сот өткен жылды қорытындылады

Әр түрлі

17:21 18 Қаңтар 2011

 

 

Дәстүрлі түрде жаңа жылдың басында облыстық сот өткен 12 айдың қорытындыларын шығарады. Былтыр өңір судьялары 3 063 тұлғаның үстінен қозғалған             2 761 істі қараған. Нәтижесінде 1 352 азамат айыпты деп табылып, 571-і  бас бостандығынан айырылды. 570 азаматқа шартты түрде бас бостандығынан айыру жазасы қолданылған. Сондай-ақ  айыпты азаматтардың 6 пайызына жазаның баламалы түрлері белгіленіпті. Жауапқа тартылғандардың 12 пайызы әйел адамдар. Жалпы  судьялар соңғы уақытта қыз-келіншектердің арасындағы қылмыстың артып отырғанын айтады. Былтыр осылайша  165 нәзік жанның 64-і абақтыға жабылған. Десек те  ізгілікке бет алған сот саласының өкілдері қылмыстық істердің өткен жылмен салыстырғанда артқанына қарамастан, түзету мекемелеріне аттанғандардың саны 300-ге қысқарғанын алға тартады. Бұл бағыттағы жұмыс одан әрі жалғасуы тиіс деп атап өтті кеңейтілген отырысқа қатысқан облыс әкімі.

Серік Біләлов, СҚО әкімі:
 – Сот жүйесі – халыққа қызмет ететін маңызды мемлекеттік институттың бірі. Елбасы Нұрсұлтан Әбішұлы Назарбаев сот жүйесінің қоғамның сенімін ақтауына  және соттардың тиімділігін арттыруға ерекше назар аударады.
 
Серік Біләлов СҚО-ның соты жалпы 2010 жылы табысты еңбек еткенін айтады. Былтыр апелляциялық тәртіпте 6 тұлғаға қатысты үкім жойылған. Ал 2009 жылы бұл көрсеткіш 13-ға жеткен. Сотта шығарылатын үкімдердің сапасы жақсарғанын судьялар да алға тартып отыр. 2009 жылмен салыстырғанда  апелляциялық тәртіпте өзгертілген үкімдер 0,1 пайызға төмендесе, кассациялық тәртіпте өзгеріп, болмаса күшін жойған үкім-шешімдер болмаған. Алайда  өткен жылы олқылықтарға жол берген судьялардың ісі  қаралып, нәтиже шығарылуы керек.

 Нұрғазы Әбдіқанов,  Солтүстік Қазақстан облыстық сотының төрағасы:
– Статистика көрсетіп отырғандай, 1-ші инстанцияда шығарылатын үкімдердің өзгеріп кетуі артқан. Бұл не себепті?  Қандай сараптау жұмыстары жүргізілді?
Ербол Рақымбеков, СҚО сотының апелляциялық сот алқасының төрағасы:
– Үкімдердің өзгеруіне бірнеше себептер анықталды.
Алдымен, бұл қаралатын іске тиісті дайындықтың болмауын көрсетіп отыр. Аталған олқылықтар жиі аяқтан шалады. Сонымен қатар, кей кездері  жас судьялардың үкім-шешімдері өзгеріп жатады.
 
Ендігі кезекте жас мамандарды үздіксіз оқытуға баса назар аударылмақ. Білікті, тәжірибелі судьяларға да заңға енгізілген соңғы өзгерістермен әрдайым танысып отыру артық етпейді.

 Гүлмира Шоқтыбаева

Бұдан әрі оқыңыз

Жерлесіміз халықаралық сұлулық байқауына қатысады
Аспандағы тылсым құбылыс
Қалада тағы бір “Шығыс кілемдер” салоны ашылды